Samfélag Augljóst er að embættismenn og þá sennilega stjórnmálamenn einnig hafi vísvitandi og skipulega blekkt Guðna Th. Jóhannesson forseta Íslands þegar hann skrifaði upp á uppreisn æru fyrir tvo kynferðisbrotamenn í september í fyrra.
„Minnisblaðið á ekki að fara til forseta og ber að eyða því í pappírstætara að fundi loknum.“ Þetta kemur fram í ágætri úttekt Stundarinnar á málinu. Málsgreinin kemur fyrir í bréfum sem ritari innanríkisráðherra sendi ráðuneytisstjóra forsætisráðuneytisins og ríkisráðsritara þann 16. september 2016, sama dag og tillögur um uppreist æru Roberts Downey og Hjalta Sigurjóns Haukssonar komu á borð Guðna Th. Jóhannessonar, forseta Íslands, og Stundin greinir frá.
Þetta getur ekki annað en verið alvarlegt siðferðisbrot. Háttsemi Sigríðar Á. Andersen dómsmálaráðherra að afhenda ekki gögn og upplýsingar um þetta ógeðfellda mál fyrr en eftir kosningar og stjórnarmyndun er svo annað og lítt skárra.
Í minnisblöðum um beiðnir Downeys og Hjalta um uppreist æru kemur skýrt fram fyrir hvaða brot á almennum hegningarlögum þeir voru dæmdir.
Í Stundinni segir að tilgreint sé, í gögnunum sem haldið var frá forseta Íslands, segi að Robert Downey hafi verið „dæmdur í 3 ára óskilorðsbundna refsivist fyrir kynferðisbrot gegn fjórum stúlkum“ Um Hjalta er tekið fram að hann hafi verið „dæmdur í 5 ára og 6 mánaða óskilorðsbundna refsivist fyrir kynferðisbrot“.
Bréfin sem Guðni fékk höfðu ekki að geyma þessar upplýsingar. Þar kom eingöngu fram að Hjalti Sigurjón og Robert Downey hefðu verið dæmdir í fangelsi fyrir brot á almennum hegningarlögum og að skilyrði til veitingar uppreistar æru séu uppfyllt.
Ómögulegt er annað en að þetta hafi alvarlegar afleiðingar fyrir það fólk sem beitti forseta blekkingum eða sat á málinu fram yfir stjórnarmyndunina.
