Björn er á fóðrum hjá ríkisstjórn Katrínar Jakobsdóttur eins og aðrir áróðurskarlar Valhallar.
Gunnar Smári skrifar:
Björn Bjarnason getur oft verið sorglega vitlaus, eins og oft hentir ofstopamenn. Hér er hann að fabúlera að vanda og misles allt; heldur að þar sem breytingar voru samþykktar á skipulagi Sósíalistaflokksins á Sósíalistaþingi um helgina að þar með hafi ekkert af samþykktu skipulagi verið til áður. Hann sér því þarna stórkostlega sviðsetningu mína, að ég hafi dregið slembivalda kjörnefnd upp úr hatti, nefnd sem síðan hafi haft samband við mig og ég svo svarað, allt á sama augnablikinu. Hið rétta er að kjörnefnd hefur verið í skipulagi flokksins frá haustinu 2017 og raðaði t.d. á lista flokksins fyrir sveitastjórnarkosningar 2018, bæði í Reykjavík og Kópavogi.
Björn er mikill dellukenningarsmiður. Ég held að hann hafi búið til hugtakið Baugspenni, til að reyna að draga úr vægi mínu og annarra starfsmanna á ritstjórn Fréttablaðsins meðan við vorum að leggja þá dómkirkju sem Mogginn var, og sem hafði gert Björn að kardinála. Síðan hefur Moggi þessi verið niðursetningur á bæjum kvótagreifa, ærulaus áróðurspési. Í hugarheimi Björns voru þetta hins vegar kaldastríðsátök, Baugur orðinn að kommúnistaflokki Sovétríkjanna og Björn sjálfur brjóstvörn lýðræðis, eins og þegar hann studdi sprengjuregn Bandaríkjahers í Víetnam og valdarán Bandaríkjastjórnar í Chile og víða um heim. Og eins og Björn hafði grafið undan mannúðarsinnum sem mótmæltu morðum Bandaríkjastjórnar, þannig vildi hann grafa undan blaðamönnum á Fréttablaðinu, óvinum sínum og auðvaldsklíkunnar sem hann tilheyrir.
Björn skiptir auðvitað engu máli í íslenskri samfélagsumræðu.
Þegar grasrótin í Eflingu reis upp gegn duglítilli forystu félagsins (og spilltri skrifstofu, eins og seinna kom á daginn) þá skrifaði Björn að þarna væri á ferð stórkostlegar ráðagerðir mínar til að ræna þremur milljörðum úr sjóðum Eflingar (hann var með töluna á hreinu, algjörlega galinn af ofstopa).
Í þessum texta frá í gær hann síðan með undarlega ávirðingar um að hið vinstri sinnaða fríblað, Fréttatíminn, hafi ekki mátt berjast fyrir lífi sínu þegar þau boð voru látinn út ganga til fyrirtækja að þau ættu ekki að auglýsa í þessum „kommasnepli“ eins og okkur var sagt að skilaboðin væru. Reynir að sverta þátttöku þeirra sem vildi halda hér uppi fjölmiðlafrelsi og róttækri samfélagsumræðu.
Björn skiptir auðvitað engu máli í íslenskri samfélagsumræðu, hann hefur bara áhrif á fáeina kjána sem hanga í bakherbergjum Valhallar. Ég sá einn slíkan vitna óbeint í þessa þvælu um kjörnefndina á Facebook áðan og reyndi að átta mig á hvaðan þetta rugl gæti verið komið, hefði átt að fatta strax að þvælan átti upptök sín í viðbrenndum kaldastríðs-litlaheila Björns Bjarnasonar.
Björn er á fóðrum hjá ríkisstjórn Katrínar Jakobsdóttur eins og aðrir áróðurskarlar Valhallar, Hannes Hólmsteinn og aðrir þesslags. Um daginn gekk Björn burt með fúlgur fjár fyrir að hafa sett saman dæmalaust grunnhyggna skýrslu um landbúnað, maður sem hefur ekki einu sinni verið í sveit. Mikil guðs blessun verður það þegar alþýða manna þarf ekki bera kostnaðinn við að halda svona mykjudreifurum að störfum. Þá verður betri lykt í samfélaginu.