Bjarni svífst einskis

Leiðari Bjarna virðist vera nákvæmlega sama um álit almennings eða bara hvers sem er. Hann þjösnast áfram á lokasprettinum. Ekki kemur annað til greina en hann sé á förum út stjórnmálum. Sendiherraráðningar voru mál málanna og nú er það anganstuskan hann Brynjar Níelsson.

Í frétt Heimildarinnar um ráðningu Brynjars í fjármálaráðuneytið segir meðal annars:

„Eftir að Brynjar beið ósigur í prófkjöri Sjálfstæðisflokksins í aðdraganda þeirra kosninga ákvað hann að segja skilið við stjórnmálin. Sóttist hann eftir því að verða oddviti flokksins í öðru hvoru Reykjavíkurkjördæmanna en var hafnað. Brynjari snerist þó hugur og ákvað að taka sæti á lista í kosningunum sem fram fóru í september 2021, en náði ekki kjöri. Hann hefur því verið varaþingmaður fyrir flokkinn á þessu kjörtímabili. 

Í kjölfar þess að Vinstri græn, Sjálfstæðisflokkur og Framsóknarflokkur endurnýjuðu stjórnarsamstarf sitt síðla árs þar ár varð Jón Gunnarsson dómsmálaráðherra. Jón réð Brynjar sem annan aðstoðarmanna sinna og hann starfaði óslitið sem slíkur þar til Jón lét af því embætti í sumar.“

Í gær las ég aðeins inn á  jonas.is. Vefsíðu Jónasar heitins Kristjánssonar. Þar nefnir hann Sjálfstæðisflokkinn Bófaflokkinn. Ljóst er hver ástæðan fyrir því er.

Fyrir fáum árum var ég að bíða eftir farþegar í Leifsstöð. Maður sem ég kannast aðeins við var í sömu erindum og ég. Hann gekk upp að mér og sagði: „Sigurjón. Ég hef fengið meira en nóg. Ég get þetta ekki lengur.“

Ég sagðist ekki átta mig á hvað hann átti við. Og sagði honum það.

„Ég er svo lánsamur að hafa gengið vel og alltaf borgað háa skatta. Og er stoltur af því. Nú get ég ekki lengur kosið minn flokk, Sjálfstæðisflokkinn.“

Hvers vegna?

„Ekki með þennan formann. Hann stendur fyrir svo margt sem ég þoki ekki.“

Bjarni er svo forhertur að hann er búinn að tilkynna mun meiri breytingar í utanríkisráðuneytinu. Spennið beltin.