Erfitt er að skilja hvað Bjarni Benediktsson er að fara þegar hann verst viljaleysi við afnema krónu á móti krónu skerðingunni. Hann notar Jóhönnu Sigurðardóttur, fyrrverandi forsætisráðherra, sem skjöld í málinu.
Hér er ræða Bjarna á lesmáli:
„Nú er ég ekki talsmaður krónu á móti krónu skerðinga sérstaklega. En ég verð að rifja það upp hvernig þetta mál er til komið. Það var hæstv. fyrrverandi forsætisráðherra og formaður Samfylkingarinnar sem leiddi í lög hina sérstöku framfærsluuppbót sem var beint sérstaklega til þeirra sem höfðu ekki úr neinu öðru að spila en berstrípuðum bótum almannatrygginga. Það var ófrávíkjanlegur hluti þeirrar aðgerðar að innleiða krónu á móti krónu skerðingu. Fyrir hverja krónu sem fólk hafði í atvinnutekjur, lífeyristekjur, fjármagnstekjur, aðrar tekjur, var tekin af þeim framfærsluuppbótin. Þetta er kerfi sem Samfylkingin kom á. Þegar menn tala um að afnema eigi krónu á móti krónu skerðinguna verða menn auðvitað að spyrja: Á að hætta með sérstöku framfærsluuppbótina eins og hún var hugsuð í upphafi eða ekki? Það er það sem hefur tafið endurskoðun þessa máls. Við höfum ætlað að færa sérstöku framfærsluuppbótina inn í hið almenna bótakerfi almannatrygginga og þetta hefur kallað á heildarendurskoðun. Það að afnema krónu á móti krónu skerðingu þýðir ekki endilega að menn ætli að vera með sérstaka framfærsluuppbót án allra skerðinga. Þá væri málið allt komið á haus og við værum komin með eitthvað allt annars konar fyrirbæri en það sem fyrrverandi formaður Samfylkingarinnar var að innleiða.“
