Bjarni 2008: „ER HÆTT VIÐ AÐ KRÓNAN VERÐI OKKUR FJÖTUR UM FÓT.“
„Ímyndið ykkur einhvern sem er í innflutningi og er að takast í sífellu á við veikari krónu, það getur verið verulega erfitt fyrir þessa aðila ef þeim tekst ekki að velta þessu út í verðlagið og viðhalda þannig sinni álagningu, þannig þetta er vandasamt mál að leysa úr og vinnumarkaðurinn hlýtur að þurfa að setjast yfir það hvernig best úr þessu spilast.“
Þetta moð er bein tilvitnun í fjármálaráðherra þjóðarinnar, Bjarna Benediktsson, formann Sjálfstæðisflokksins. Hann var í viðtali á Útvarpi Sögu. Viðtal sem er sárt hlustunar. Sjálfstæðisflokkur Bjarna er ekki svipur hjá sjón miðað við það sem áður var. Blessunarlega kunna einhverjir að segja. Kannski á flokkurinn ekki bjarta framtíð með formann sem þennan. Sem hugsar svona og talar.
Eina lausn Bjarna er að velta vandanum yfir á neytendur með þeim afleiðingum sem það hefur. Þá hækkar allt. Vörur, vextir og barasta allt saman. Þetta telur ráðherrann samt sem hinu bestu lausn. Kannski hina einu lausn.
Krónuvandinn er ekki nýr í huga Bjarna: „En sé horft til lengri tíma er hætt við að krónan verði okkur fjötur um fót. Sá sveigjanleiki sem krónan veitir okkur til að kljást við afleiðingar mistaka í hagstjórn eða til að bregðast við ytri áföllum á sér því miður þá skuggahlið að vera sveifluvaldandi og geta ýtt undir óstöðugleika í hagkerfinu. Óstöðugur gjaldmiðill dregur úr trausti á hagkerfinu og þar með möguleikum okkar á að nýta til fulls þau tækifæri sem felast í innri markaði Evrópu, laða til okkar fjárfestingar og hámarka samkeppnishæfni atvinnulífsins. Vöxtur nýrra atvinnugreina og fyrirtækja sem starfa að stórum hluta erlendis en eiga höfuðstöðvar hér á landi takmarkast mjög af stærð myntarinnar og því óöryggi sem af henni hlýst,“ skrifaði hann ásamt Illuga Gunnarssyni í desember 2008.
Þá var Bjarni greinilega víðsýnni en nú. Leitaði þá lausna. Pissaði ekki bara í skóinn sinn.
-sme
