Bjarni með allt í skrúfunni og samtrygging stjórnmálanna

Hversu vesælir geta menn orðið? Bjarni Benediktsson er forréttindamaður. Bjarni er í hópi svokallaðra fyrirmenna. Hvernig í ósköpunum fer maður í stöðu Bjarna Benediktssonar í kolólöglega svallveislu? Og að vera rekinn út með lögregluvaldi. Hversu aumt getur þetta orðið?

Skrímsladeildin verður ræst út. Ráðist verður að gagnrýnendum Bjarna. Vitað er að Bjarni lætur safna saman umræðum um sig og hvaða fólk tekur undir gagnrýnina. Hefndirnar verða margar. En þær verða. Og harðar. Svo segir sagan.

Bjarni Benediktsson fer sínu fram. Hvort hann hafi gengið of langt núna er óvíst. Katrínar Jakobsdóttir bíður þess að tilkynna opinberlega að hún standi með Bjarna. Eða hvað? Hún er í kastþröng. Flokkurinn hennar á í vanda. Trúlega verða Vinstri græn að kyngja enn einum ógeðsdrykknum.

Samtrygging stjórnmálanna.

Siðferðislegt uppgjör er framundan. Mun skrímsladeildin og aðrir innmúraðir og innvígðir ná að verja Bjarna? Bjarni er flokknum og „eigendum“ hans ómetanlegur. Nær að drepa öll mál sem þeim eru á móti skapi. Sem eru andstæð þeirra hagsmuna.

Pólitísk átök eru framundan. Gerum samt ráð fyrir að fáir stjórnarandstöðuþingmenn munu láta til sín taka. Það þjónar ekki hagsmunum þeirra að særa Bjarna um of. Samtrygging stjórnmálanna er sterk. Þetta er galin staða.

-sme