Flaustursleg vinnubrögð fjármálaráðherra og ríkisstjórnarinnar allrar.
Katrín Baldursdóttir skrifar:
Bjarni Benediktsson er vanhæfur í starfi fjármálaráðherra. Hann ræður ekki við stóru málin. Málin sem ríkisstjórnin kynnti sem sterkustu efnahagslegu burðarstoðir í baráttunni við kórónuveirufaraldurinn á Íslandi, eða brúarlánin og stuðningslánin, sýna þessa vanhæfni mjög skýrt. Ekkert fyrirtæki á Íslandi hefur fengið brúarlán og ekki einu sinni búið að opna fyrir umsóknir um stuðningslán sem áttu að styðja við smærri fyrirtæki. Þá breytist hlutabótaleiðin allt í einu í andhverfu sína. Átti að verða leið til að styrkja ráðningasamband svo fólki yrði ekki sagt upp en varð styrkur til að segja fólki upp. Þetta er klúður frá upphafi til enda. Flaustursleg vinnubrögð fjármálaráðherra og ríkisstjórnarinnar allrar. Og afleiðingarnar af því eiga eftir að koma betur og betur í ljós þegar líða tekur á árið.
stóru spillingaröflin…
Bjarni Ben virðist ráða best við að halda í horfinu og passa upp á að stóru spillingaröflin, stórfyrirtæki í sjávarútvegi, ríku ættirnar eins og Engeyjarættin hans, fjármagnseigendur og milljónamæringar haldi stöðu sinni og fái að blómstra sem aldrei fyrr og fái sífellt stærri sneið af þjóðarkökunni. Að öðru leyti er hann ekki hæfur í starfið.