Björn Leví Gunnarsson átti orðastað við Katrínu Jakobsdóttur forsætisráðherra um Bjarna Benediktson og siðareglur ráðherra.
Björn Leví: „Í nýlegu svari fjármálaráðherra kom fram áhugaverð túlkun sem mig langar til að spyrja hæstvirtan forsætisráðherra út í. Spurningin var hvenær mat á því hvort efni skattaskjólsskýrslunnar varðaði almannahag eða ekki hefði farið fram. Hvenær fór matið fram? Svarið var, með leyfi forseta:
„Skýrsla um eignir Íslendinga á aflandssvæðum var unnin að frumkvæði Bjarna Benediktssonar, fjármála- og efnahagsráðherra. Birting hennar var því algerlega án utanaðkomandi kvaða eða mats á því hvort þær ættu við samkvæmt siðareglum.“
Virðulegi forseti og hæstvirtur forsætisráðherra. Þetta svar gerði mig kjaftstopp í ansi langan tíma. Er það virkilega svo að ef um frumkvæði ráðherra er að ræða þurfi ekkert að fara eftir siðareglum? Ég bið vinsamlega um skýrt svar við þessari spurningu, svar sem byrjar annaðhvort á jái eða neii áður en útskýringar byrja: Já, ráðherra þarf ekki að fara eftir siðareglum í frumkvæðismálum, eða: Nei, ráðherra þarf að fara eftir siðareglum í frumkvæðismálum.“
Katrín: „Jú, siðareglur eiga auðvitað við um öll störf hæstvirtrs ráðherra sem og háttvirtra þingmanna hvernig sem þau ber að. Hins vegar er það svo, og það er alveg hárrétt, sem háttvirtur þingmaður hafði eftir upp úr svari hæstvirts fjármálaráðherra, að sú skýrsla sem um ræðir var unnin að frumkvæði ráðherrans og væntanlega er verið að vísa til þess í þessu svari sem ég hef ekki lesið. En siðareglurnar eiga við um öll störf ráðherra.“
