„Hann er búinn að opna á meira fyrir þá ríku.“
Guðmundur Ingi Kristinsson, þingmaður Flokks fólksins, er ódeigur í baráttunni fyrir bættum hag lífeyrisþega. Hann sætti færis og spurði Bjarna Benediktsson fjármálaráðherra nokkurra spurninga.
„Við 570.000 kr. lífeyrissjóðsgreiðslur eftirlaunaþega fá þeir ekki krónu frá Tryggingastofnun ríkisins. En hvað fær lífeyrisþegi frá Tryggingastofnun ríkisins í boði núverandi ríkisstjórnar með lögum um greiðslu hálfs lífeyris?“
Áður en kom að Bjarni skýrði Guðmundur Ingi mál sitt frekar.
„Jú, ef ellilífeyrisþegi hefur 248.106 kr. úr lífeyrissjóði fær hann hálfan á móti hálfum frá ríkisstjórninni. Hann fær 124.053 kr. á mánuði í lífeyri frá TR og í viðbót fær hann heimilisuppbót upp á 31.348 kr., eða samtals 155.000 kr. Og þetta er í boði ríkisstjórnarinnar. Þótt hann hafi 570.000 lífeyrissjóði, 1 milljón í atvinnutekjur eða samtals 1,5 milljón í tekjur, fær hann 155.000 kr. frá ríkinu.“
„Ég verð að segja að ég held að það sé útilokað að svara í neinum smáatriðum því hvernig þetta flókna samspil kemur út í einstaka dæmum og ég er sannarlega ekki í aðstöðu til að svara því hér og nú miðað við þá löngu upptalningu á forsendum sem hv. þingmaður var með,“ voru fyrstu viðbrögð ráðherrans.
Bjarni sagði svo: „Ég hef hins vegar oft og tíðum farið inn á tr.is. Það getur maður gert í tölvunni eða símanum og slegið inn forsendur um aldur viðkomandi örorkulífeyrisþega, félagslega stöðu. Við getum sem dæmi tekið einstakling sem er hefur þrjú börn á framfæri, fær meðlagsgreiðslur, hefur orðið öryrki snemma á lífsleiðinni, segjum t.d. 25 ára, býr einn með þremur börnum, hefur engar aðrar tekjur af nokkru tagi, engar, ekki fjármagnstekjur, engar lífeyristekjur, engar atvinnutekjur, engar tekjur. Hvað segir reiknivélin okkur að sá örorkulífeyrisþegi hafi í stuðning frá almannatryggingum eftir skatt? Svarið við því er að ráðstöfunartekjurnar eftir skatt eru rétt um 461.000 kr. Það er stuðningurinn sem kerfið okkar sýnir þeim sem eru í þeirri viðkvæmu stöðu.“
Guðmundur Ingi svaraði ráðherranum: „Við erum einmitt í þessari reiknivél, maður getur sett inn milljón í lífeyrissjóð, milljón í atvinnutekjur, milljónir í fjármagnstekjur, samt borgar ríkið 155.000 kr. til þessa manns sem er með yfir 2 milljónir útborgaðar. Á sama tíma slær maður inn öryrkja, 70.000 kr. frá lífeyrissjóði. Núll. Af hverju? Ég spyr þig: Hvernig getur það verið eðlilegt að á sama tíma og ráðherra segir að frumvarp okkar um að hætta að skerða atvinnutekjur eldri borgara kosti fé og sé bara fyrir þá ríku, þegar það stoppar við 570.000, en þetta frumvarp, hálfur og hálfur, sem búið er að koma í gegn, stoppar ekki einu sinni við 3 milljónir? Hvernig stendur á því?“
Bjarni svaraði: „Ég á erfitt með að skilja að menn finni hjá sér þörf til að gagnrýna kerfisbreytingu sem við litum á sem umbótamál til að auka valfrelsi fólks og horfa til þess að aðstæður fólks geti verið misjafnar og sumum hentaði að nýta sér þennan sveigjanleika á meðan aðrir myndu einfaldlega kjósa að gera það ekki. Að öðru leyti heyrist mér að hér sé á ferðinni gagnrýni á skerðingu vegna lífeyristekna og ég held að við getum verið sammála um að það getur komið illa út í einstaka tilvikum hvernig skerðingarreglurnar eru. Þær eru tilraun, af veikum mætti, til að tryggja að fjármunirnir dreifist sem mest til þeirra sem hafa minnst.“
Fyrr í umræðunni sagði Guðmundur Ingi:
„Í umræðu Flokks fólksins um að hætt verði að skerða atvinnutekjur eldri borgara, sagði ráðherra að það myndi opna á meira fyrir þá ríku. En hann er búinn að opna á meira fyrir þá ríku. Ef einhver er með 1 kr. undir 248.000 kr., sem flestir landsmenn eru með, fær hann ekki krónu. Ein króna tekur 155.000 kr. frá þeim sem mest þurfa á því að halda. Á sama tíma er 70.000 króna lífeyrissjóður 0 hjá flestum sem fá greitt úr lífeyrissjóði, öryrkjum og öðrum, sem að stærstum hluta eru konur. Er þetta ykkar réttlæti? Hvernig ætlið þið að breyta þessu?“
Ekkert svar kom við þessum spurningum.
