Félagsmenn VR vilja í auknum mæli leggja áherslu á beinar launahækkanir í kjarasamningum og eru ekki reiðubúnir til að taka þátt í þjóðarsátt. Þetta er meðal þess sem lesa má úr niðurstöðum könnunar meðal félagsmanna sem kynnt var á fundi trúnaðarráðs í vikunni. Á fundinum var rætt um stöðuna í kjaramálum og næstu skref. Formaður félagsins fékk umboð til að halda vinnu áfram við undirbúning launaliðar kröfugerðarinnar.
Blönduð leið krónutölu- og prósentuhækkunar hentar félaginu vel, sagði Ólafía, en innan VR er millitekjuhópurinn stærstur. Þessir félagsmenn hafi undanfarin ár tekið á sig mestu byrðarnar og mikilvægt að leggja áherslu á að tryggja kjör þeirra ásamt því að hækka lægstu launin.
