BB: Benedikt er vopnaður títuprjóni

„Títuprjónastungum smáflokka og talsmanna þeirra í Sjálfstæðisflokkinn má ef til vill fagna sem lífsmarki innan flokkanna en að lifa fyrir slíkt er lítils virði til lengdar,“ skrifar Björn Bjarnason, einn helsti áhrifamaður Sjálfstæðisflokksins, á heimasíðu sína.

Skrif Björns, sem hann beinir einkum gegn frænda sínum Benedikt Jóhannessyni formanni Viðreisnar og fjármálaráðherra, skipta miklu máli í þeim átökum sem eru milli félaga Viðreisnar og Sjálfstæðisflokksins.

Birni þykir Benedikt ekki alsaklaus og um leið varar hann við afleiðingu þess leiks sem hann nú leikur. „Benedikt Jóhannesson samdi sig frá evrunni og kaus í staðinn að verða fjármálaráðherra? Sé eitthvað „djarft og óvenjulegt“ við orð Benedikts nú um evruna er það hvort hann sé að skrifa sig frá eigin embætti til að geta utan rikisstjórnar barist fyrir stefnumáli sínu.“

Leiðari sem Kolbrún Bergþórsdóttir, ritstjóri DV, skrifaði pirrar Björn. „Skilja má orð Kolbrúnar á þann veg að hún telji orð Benedikts annað og meira en „brölt“ sem Sjálfstæðismenn stöðvi. Kolbrún ætti að svara innan hvaða flokks utan Viðreisnar og hugsanlega Samfylkingar evru-aðdáun Benedikts nýtur stuðnings. Ritstjórinn sem einnig fjallar á jákvæðan hátt um auðlindagjalds-brölt Þorgerðar Katrínar Gunnarsdóttur, ráðherra Viðreisnar, skuldar lesendum sínum skýringu á hvar Viðreisn getur komið stefnumálum sínum í framkvæmd.“

Það er Birni líkt að hitta naglann á höfuðið, þar sem hann vekur athygli á; „…orð Benedikts annað og meira en „brölt“ sem Sjálfstæðismenn stöðvi.“

Um þetta snýst þessi harða deila. Takist Sjálfstæðisflokknum ekki að stöðva Benedikt og Viðreisn er ólíklegt að ríkisstjórn Bjarna Benediktssonar verði á vetur setjandi.

-sme