Ávarp Katrínar: Ákaflega borgarlegt þjóðernisávarp, fullkomlega stéttablint

Gunnar Smári skrifar:

Ákaflega borgarlegt þjóðernisávarp, fullkomlega stéttablint. Katrín talar um þjóðarvefnaðinn þar sem hver hefur sitt hlutverk, það jaðraði við að þetta væri stétt með stétt-boðskapur. Í lokin ræddi hún um innflytjendur (ekki endursagt í fréttinni) og um góð áhrif þeirra á samfélagið, en gat þess ekki að stærsti hluti innflytjenda er hópur sem verður hvað harðast fyrir stéttamun í samfélaginu; er á lægstu laununum, á jaðri vinnumarkaðar með minnstu réttindin og á jaðri húsnæðismarkaðar með hæstu leiguna eða býr í ófullnægjandi húsnæði í iðnaðarhverfum.

Katrín horfði algjörlega fram hjá því að kórónasamdrátturinn hefur magnað upp ójöfnuð, hin ríku hafa orðið ríkari en hin fátæku misst vinnuna og tekið á sig gríðarlegt tekjufall, hafa borið allar byrðarnar af áfallinu. Þetta er þó rætt af öllum alls staðar í heiminum; alþjóðastofnanir og alls kyns hugveitur benda á þetta alla daga. En þetta hefur ekki náð eyrum ráðherranna á Íslandi. Katrín talaði um cóvid sem sigur heildarinnar þar sem allir lögðu sig fram og sem af orðum hennar mátti skilja að allir hefðu uppskorið jafnt. Það er einfaldlega rangt og glatað að halda því fram á þessum degi.