„Ég fékk það staðfest á fundi fjárlaganefndar fyrir nokkrum vikum síðan frá fulltrúum ráðuneytis að það liggur ekki fyrir nein greining á því af hálfu ríkisins hversu mörgum flóttamönnum og útlendingum íslenskir innviðir þola að taka á móti.“
„Ég kem hingað í þennan ræðustól til að gera útlendingamál að umtalsefni,“ sagði Arnar Þór Jónsson, varaþingmaður Sjálfstæðisflokksins.
„Hér hefur verið mikið þóf um þau mál í nokkra daga til að koma í veg fyrir að nauðsynlegt frumvarp dómsmálaráðherra, sem fæli í sér úrbætur, nái fram að ganga. Ef við viljum bjóða fólki heim til okkar, gestum heim, þá viljum við taka vel á móti þeim og undirbúa það vel og sjá til þess að allt sé til reiðu þannig að fólk komi ekki ósátt og fari ekki ósátt og fólk beri virðingu fyrir okkar heimili. Ísland er heimili okkar,“ sagði hann.
„Ég fékk það staðfest á fundi fjárlaganefndar fyrir nokkrum vikum síðan frá fulltrúum ráðuneytis að það liggur ekki fyrir nein greining á því af hálfu ríkisins hversu mörgum flóttamönnum og útlendingum íslenskir innviðir þola að taka á móti. Slík greining þarf að liggja fyrir, sérstaklega blasir það við þegar upp er komið öngþveiti í málum á landamærum Íslands. Hér verður að taka verulega á þessum málum.,“ sagði Arnar Þór og síðan sagði hann:
„Allt þetta má gera. Allt þetta eigum við að gera.“
„Ég vil vekja athygli þingheims á því að í gær flutti forsætisráðherra Bretlands, Rishi Sunak, ræðu í breska þinginu þar sem hann lagði til og er að leggja fram frumvarp um að landamæraeftirlit verði stóreflt í Bretlandi, aðgerðir verði samræmdar til að koma í veg fyrir skipulagðan innflutning á fólki og misnotkun á fólki sem þar á í hlut. Það verði gert átak til að koma í veg fyrir að fólk geti unnið ólöglega í landinu og t.d. opnað bankareikninga. Stöðvuð verði rándýr og óhófleg útgjöld í þessum málaflokki sem fela m.a. í sér að fólk sé vistað á rándýrum hótelum. Aðgerðir Rishis Sunaks miða að því að skera þetta niður margfalt og helminga útgjöldin og jafnframt lagði hann til að málshraði yrði stóraukinn og að Albanía yrði tekin aftur út fyrir sviga og það verði hægt á grundvelli samninga að snúa Albönum við á landamærunum. Allt þetta má gera. Allt þetta eigum við að gera.“
