„Háttvirtur þingmaður Ásmundur Friðriksson stígur nú ekki oft upp í þessa pontu til að tjá sig. Ég ætla ekki að kvarta undan því, síður en svo, bara því minna sem hann stendur hér, því betra. En þeim mun verra er hvað hann nýtir aðstöðuna úti í sal meira til tjáningar; hreytir ónotum í átt að þingmönnum sem hann er ósammála frekar en að standa hér og koma skoðun sinni á framfæri, eins og á að gera í þessum sal. Áðan undir óundirbúinni fyrirspurn háttvirts þingmannsHelgu Völu Helgadóttur um sveltistefnu Jóns Gunnarssonar dómsmálaráðherra gagnvart Landhelgisgæslunni, um þá ákvörðun ráðherra að mylja undan viðbragðsgetu Landhelgisgæslu Íslands, þá tautaði þingmaðurinn Ásmundur Friðriksson hér úti í sal: Þetta er skítlegt,“ sagði Andrés Ingi Jónsson á Alþingi fyrr í dag.
„Einhvern tímann hefði ég nú haldið að forsetar myndu áminna þingmenn um að gæta orða sinna þó að svona orð féllu úti í sal. Það var ekki gert í þessu tilviki en ég vænti þess að forseti komi þeim boðum til þingflokksformanns Sjálfstæðisflokksins að Ásmundi Friðrikssyni verði gert ljóst að svona munnsöfnuður eigi ekki erindi í þingsal þó að hann sé að reyna að verja vin sinn, Jón Gunnarsson, í því að mylja undan viðbragðsgetu Gæslunnar.“
