Stjórnmál Ásmundur Friðriksson, þingmaður Sjálfstæðisflokksins, skrifar um sjónvarpsstöðvar tvær og umfjöllun þeirra um sama mál. Ég ef Ása orðið:
„Ólíkt fóru þær að fréttastofur Ríkissjónvarpsins og fréttastofa Stöðvar 2 í gærkvöldi, föstudagskvöld. Þar var fjallað um nýsett Búvörulög. Ríkissjónvarpið sýndi fagmennsku og gaf andstæðum sjónarmiðum gott rými í fréttatíma sínum. Höfð voru viðtöl við aðila beggja vegna skoðanaborðsins og í öllu fylgt góðri reglu jafnræðis í skoðunum. Ég hrósa fréttastofu Ríkisútvarpsins fyrir þessi vinnubrögð.
Stöð 2 hafði hins vegar viðtöl við tvo andstæðinga laganna, Ólaf Stephensen framkvæmdastjóra Félags atvinnurekenda sem að venju sendi bændum þessa lands kaldar kveðjur. Þá var haft viðtal við álitsgjafa allra mála í þinginu, Sigmar Guðmundsson, gamlan kollega í fréttamennskunni. Hann grautaði saman afkomu margra greina og áður en viðtalinu við hann lauk sem var ein samfelld árás á bændur hafði hann komið að afkomu leigufélaga, útgerðar og annarrar óskyldrar starfsemi sem stór fyrirtæki stunda.
Þar gerði hann grein fyrir afkomu Kaupfélags Skagfirðinga í fjölbreyttri starfsemi, en eðlilega gleymdi hann því hvernig það Kaupfélag stendur með bændum í sinni heimabyggð og styður með ráð og dáð og stendur vörð um afkomu þeirra með áður óþekktum myndarskap á Íslandi. Slík samfélagsleg ábyrgð ætti erindi við þjóðina, en telst líklega ekki frétt þegar eitthvað er vel gert af stórfyrirtæki í heimabyggð. Sannleikurinn á engan möguleika þegar afvegaleiða þarf umræðuna í viðreisnarstíl. Fréttastofa Stöðvar 2 hefur áður stundað þessa einhliða fréttamennsku þegar fjallað er um afkomu bænda og er nærtækt dæmi þegar nýlega var andstæðingur blóðmerarhalds leiddur fram í fréttatíma Stöðvar 2, af hestamanni og fréttamanni til að níða þá búgrein niður í svaðið. Þar fengu ólík sjónarmið ekkert pláss í fréttatímanum.
Það er ástæða til að hrós því sem vel er gert, hitt mun fólkið dæma.“
