„Gylfi Arnbjörnsson, forseti ASÍ, varaði við því að horfið yrði aftur til gömlu byltingaleiðarinnar sem sögulega hefði leitt kjarabaráttuna í ógöngur.“ Þetta er hluti fréttar Fréttablaðsins í dag. Í Mogganum sagði Eyjólfur Árni Rafnsson, formaður Samtaka atvinnulífsins: „„Ég trúi ekki öðru en fólk sýni yfirvegun og skynsemi þegar í alvöruna er komið. Að mínu mati eru ummæli formanns VR ekki af þeim toga.“
Ragnar Þór Ingólfsson, formaður VR og ræðumaður á baráttufundi verkafólks í gær, boðar hörð átök, t.d. skæurverkföll.
Ný forysta í stærstu félögunum ætlar að gera meira. Ragnar sagði meðal annars: „Við boðum baráttu sem hefur ekki sést í íslenskri verkalýðshreyfingu í áratugi! Við munum berjast fyrir kerfisbreytingum! Við erum að tala um baráttu gegn verðtryggingu og fyrir lækkun vaxta, breytingar á skattkerfinu með áherslu á hækkun persónuafsláttar, regluverk til verndar leigjendum. Við viljum lög á viðbjóðslega okurlánastarfsemi smálánafyrirtækjanna sem beina kröftum sínum kerfisbundið að þeim sem höllustum fæti standa í okkar samfélagi. Heilbrigðiskerfið og þjóðarátak í húsnæðismálum! Það verður ekkert skilið eftir í okkar baráttu sem skiptir ykkur máli. Ykkar kröfur eru okkar baráttumál.“
Það er ljóst að forseti Alþýðusambandsins og forysta atvinnurekenda eru ósammála þessu. Ríkisvaldið, sem nú hefur tekið ljósmæður í bóndabeygju og þvingað þær til aukavinnu, mun ekki fagna nýjum og ákveðnum kröfum.
Framundan eru harðari átök en hafa sést í langan tíma. Hvorki Gylfi Arnbjörnsson né Eyjólfur Árni hafa mátt til að stöðva þá skriðu sem komin er af stað.
Sigurjón M. Egilsson.
