Þar þarf að ýta vanhæfum fulltrúum sérhagsmuna frá borðinu, fólkinu sem er í sömu klúbbum og Ásgeir Jónsson.
Sólveig Anna Jónsdóttir skrifar:
Ásgeir Jónsson, seðlabankastjóri, er fyrrum yfirhagfræðingur Kaupþings og aðalráðgjafi Gamma. Einn af hrun-prinsunum okkar. Hann fékk starfið sitt í Seðlabankanum af því að hann er sérhagsmunaaðilum (fjármagnseigendum og auðvaldi) þóknanlegur. Það veit öll alþýða þessa lands. Hann dirfist að uppnefna fulltrúa launafólks „hagsmunaaðila“, og beitir hótunum til að koma í veg fyrir að þeir nýti stjórnarskrárvarið tjáningarfrelsi sitt! Enn á ný (móðurgyðjan veri með mér, þetta er alveg endalaust) afhjúpast trylltur hrokinn sem þeir samborgarar okkar sem tilheyra auð og valdastétta þessa lands búa yfir og sá geigvænlegi eignaréttur sem þeir telja sig hafa yfir öllu á Íslandi, orðunum okkar líka. Mikið einstaklega er ég komin með nóg af þessu rugli og ég veit að ég er sannarlega ekki ein um það.
Já, það er á hreinu að það þarf algjörlega uppstokkun í lýðræðislegri aðkomu sjóðfélaga að stjórnun lífeyrissjóða. Þar þarf að ýta vanhæfum fulltrúum sérhagsmuna frá borðinu, fólkinu sem er í sömu klúbbum og Ásgeir Jónsson.
