Ásakanir starfandi formanns Eflingar eru uppspuni og ógeðslegur rógur

Í gær kaus flokkstjórn Samfylkingarinnar sér nýja fimm manna stjórn verkalýðsmálaráðs flokksins. Þetta segist flokkurinn gera til að efla „tengslin við verkalýðshreyfinguna“. Í nýju fimm manna stjórninni eru m.a. Halldóra S. Sveinsdóttir formaður Bárunnar og 3. varaforseti ASÍ, og Agnieszka E. Ziólkowska, starfandi formaður Eflingar. Sem nýkjörnum formanni annars stærsta verkalýðsfélags landsins sem jafnframt er annað stærsta félagið innan ASÍ þykir mér valið á þessum tveimur konum áhugavert, sérstaklega í ljósi þess sem flokksforystan segir um tilganginn; efling tengsla við hreyfinguna.

Þann 9. mars síðastliðinn sendi lögmaður bréf fyrir mína hönd og Viðars Þorsteinssonar. Viðtakendur voru Drífa Snædal, forseti Alþýðusambands Íslands og fyrrnefnd Halldóra Sveinsdóttir. Ástæðan erindisins voru þau ömurlegu og svívirðilegu ummæli sem Halldóra lét falla í viðtali við Mbl.is 7. mars síðastliðinn. Þar talaði hún fyrir hönd ASÍ, og veitti lögmæti þeim upplognu, grafalvarlegu ásökunum sem starfandi formaður Eflingar hefur dreift um fjárdrátt innan Eflingar á formannstíð minni. Halldóra lét í viðtalinu hljóma sem að ASÍ fylgdist með „rannsókn“ starfandi formanns á fjárdrætti þeim sem ég og Viðar áttum að hafa stundað og hefði til skoðunar að blanda sér í málið, sökum alvarleika þess.

Staðreyndin er auðvitað sú að ásakanir starfandi formanns Eflingar eru ekkert annað en uppspuni og ógeðslegur rógur. Endurskoðunarfyrirtækið Deloitte gerir engar athugasemdir við viðskipti Eflingar við vefhönnunarfyrirtækið Sigur vefstofu (lygarnar um fjárdráttinn voru að ég og Viðar hefðum stolið peningum félagsins til að gefa Andra Sigurðssyni, vefhönnuði) eins og fréttir hafa birst um, m.a. hér:

Þrátt fyrir að sex dagar séu nú liðnir síðan að bréfið var sent og þrátt fyrir að ljóst sé að nákvæmlega ekkert sé til í ásökunum Agnieszku um fjármálamisferli og glæpastarfsemi hefur enn ekkert svar borist, hvorki frá forseta ASÍ né Halldóru Sveinsdóttur. Halldóra, sem tók því tækifæri fagnandi að breiða út lygar og ærumeiðingar um mig og Viðar, hefur ekki getað tekið sér tíma til að stíga fram og biðjast afsökunar á því að ráðast að mannorði okkar með grófum og grafalvarlegum hætti. Kannski vegna þess að hún hefur verið svo upptekin við framboðsmál sín innan vébanda Samfylkingarinnar? Flokksins sem með vali á henni í verkalýðsráðið hefur opinberað sig sem fylgjandi því að innleiðing SALEK fyrirkomulagsins hefjist; vissulega ekki undir því ónýta vörumerki sem lífsreynd og skynsöm alþýða þessa lands kann að vara sig á, en endurskírðu sem Grænbók um vinnumarkaðsmál eða einhverju álíka loðnu búrókratísku bulli.

…þrátt fyrir að forseti ASÍ hefði tekið þátt í því með valdastéttinni að smygla endurvakningu SALEK inn í loforðapakka stjórnvalda…

Halldóra, sem Samfylkingin hefur ákveðið að sé einn okkar mikilvægasti verkalýðsfrömuður, var einn dyggasti liðsmaður „gömlu“ verkalýðshreyfingarinnar (Gylfa-genginu) og einn helsti áhuga og stuðningsmaður þess að ASÍ tæki þátt í tilraun valdastéttarinnar til að taka lýðræðislega stjórn verkafólks af eigin kjarabaráttu úr þeirra höndum og gera elítu skrifstofuvirkisins í Guðrúnartúni (og allra hinna skrifstofuvikjanna) endanlega að stóru stjórunum yfir tilveru vinnuaflsins. Hún barðist hatrammlega fyrir því innan hreyfingarinnar að Drífa Snædal tæki þátt í vinnu við SALEK-Grænbók stjórnarráðsins og SA (en þeirri vinnu átti sá landskunni vinur verkalýðsins Vilhjálmur Egilsson að stýra). Þrátt fyrir algjöra og afdráttarlausa andstöðu mína og Ragnars Þórs, formanns VR, og þrátt fyrir að forseti ASÍ hefði tekið þátt í því með valdastéttinni að smygla endurvakningu SALEK inn í loforðapakka stjórnvalda vegna Lífskjarasamningsins, án þess að upplýsa mig eða samninganefnd Eflingar um að það stæði til, vildi Halldóra óð og uppvæg tryggja þátttöku ASÍ í ruglinu. Það var aðeins vegna margra mánaða baráttu minnar á vettvangi ASÍ sem að draumar valdastéttarinnar um SALEK-Grænbók unna með samþykki stærstu samtaka vinnandi fólks á Íslandi, ASÍ, urðu ekki að veruleika.

„Samfylkingin eflir tengslin við verkalýðshreyfinguna“. Það ætlar flokkurinn að gera með því að hefja til metorða og valda manneskjur sem virðast helst kunna og vilja notast við baktjaldamakk, valdníðslu og rógburð í stöfum sínum. Starfandi formaður Eflingar hefur til dæmis eitt síðustu vikum í að sniðganga ályktun trúnaðarráðs Eflingar af einbeittri og forhertri valdníðslu, um að flýta skuli aðalfundi félagsins svo að réttkjörin forysta komist til valda, ásamt því að breiða út lygar um nýkjörinn formann, hvar sem hún hefur haft til þess tækifæri. Hvernig þessar manneskjur eiga að efla tengslin inn í hreyfinguna í aðdraganda kjarasamninga sem öll hljóta að vita að verða erfiðir og örlagaríkir hlýtur að vera mörgum spursmál. Það verður í það minnsta forvitnilegt að fylgjast með því hverju fram vindur um tengsla-eflinguna.

Ef að mér berst einhvern tímann svar við kröfu lögmanns míns að 3. varaforseti ASÍ biðji mig afsökunar á því að hafa ranglega gefið í skyn í nafni ASÍ að ég hafi gerst sek um fjármálamisferli í störfum mínum fyrir Eflingu læt ég ykkur vita.