Miðflokkurinn í Kópavogi leggur fram nýjar áherslur í íþróttamálum í Kópavogi sem miða að því að sýna íþróttafélögum meira traust og virðingu. Bæjarfélagið stendur í þakkarskuld við fjölda sjálfboðaliða sem halda kraftmiklu félagsstarfi gangandi ár eftir ár. Með langtímasamningum við íþróttafélögin, til allt að 15 ára, ætlar Miðflokkurinn að forgangsraða skv. óskum þeirra, vinna að uppbyggingu mannvirkja, styðja fjárhagslega við reksturinn og fela samtökum umsjón með mannvirkjum bæjarins þegar slíkt á við.
Íþróttastarf í Kópavogi er fjölbreytt og allir eiga að finna eitthvað við sitt hæfi. Öflugt barna- og unglingastarf hefur mikla uppeldislega þýðingu, mikið forvarnargildi og við það þarf bæjarfélagið að styðja með myndarlegum hætti. Afreksstarfið hefur mikið gildi, við viljum eiga einstaklinga og lið í fremstu röð sem vinna til viðurkenninga, styrkja ímynd bæjarins og eru fyrirmyndir æskunnar. Miðflokkurinn boðar aukinn stuðning við afreksfólk og afrekslið í íþróttum.
Miðflokkurinn vill einnig að Kópavogsbær nái til ungs fólks sem ekki tekur þátt í skipulögðu íþróttastarfi með hreyfingu í huga. Aukin kyrrseta barna og unglinga er vandamál sem þarf að taka á með skipulögðum hætt. Þar hefur bæjarfélagið mikilvægu hlutverki að gegna.
Bæjarbúar geta nýtt sér sundlaugar Kópavogs og líkamsræktarþjónustu í sömu húsakynnum á sanngjörnu verði. Rétt er að hvetja almenning til að nýta sér þessa þjónustu sér til heilsubótar. Miðflokkurinn vill lengja opnunartíma sundlauganna í Kópavogi.
Miðflokkurinn vill auka hreyfingu eldri borgara í samstarfi við íþróttafélögin og stuðla þannig að betri heilsu og almennri líðan.
Miðflokkurinn vill markaðssetja Kópavog sem bæ íþrótta og laða til bæjarins stóra viðburði. Landsmót hestamanna 2022 er liður í þeirri viðleitni.
Miðflokkurinn ætlar að hækka frístundastyrk til barna upp í 75.000 krónur og heimila foreldrum að sækja um hálfan frístundastyrk fyrir þriggja og fjögurra ára börn sem mörg hver taka þegar þátt í skipulögðu íþróttastarfi.
Nýr framhaldsskóli sem knýja þarf á um í Kópavogi í tengslum við Kórinn og svæði hestamanna á að endurspegla ofangreindar áherslur með sérhæfða íþróttabraut fyrir nemendur.
Geir Þorsteinsson, skipar 1. sæti á framboðslista Miðflokksins í Kópavogi.