Rósa Björk kvaddi Vinstrigræn í gær. Þó fyrr hefði verið. Rósa Björk hefur aldeilis látið eitt og annað yfir sig ganga. Í raun vekur það undrun að Rósa Björk hafi ekki yfirgefið flokkinn fyrir lifandis löngu. Hún var á móti stjórnarsamstarfinu. Ákvað að láta á það reyna. Þvílík þolinmæði. Eða hvað?
Var Rósa Björk sammála svikum Katrínar Jakobsdóttur? Og er kannski enn? Katrín heillaði allt það fólk sem vill réttlátt samfélag. Katrín, þá sem stjórnarandstæðingur, hélt magnaða ræðu um að þau sem verst hafa getið ekki og megi ekki bíða eftir réttlætinu. Hreint mögnuð ræða.
Og hvað svo? Ekkert. Rósa Björk hefur skýra sýn í stjórnmálum. Erfiðara er að átta sig á félaga hennar Andrési Inga. Það er annað mál. Þess vegna má undrast að Rósa Björk hafi látið yfir sig ganga skýr svik Katrínar forsætisráðherra. Hún kýs að hluti þjóðarinnar hafi rétt um 240 þúsund krónur á mánuði.
Vinstrigræn hafa tapað vinstrihugsjóninni. Fyrir löngu. Þolinmæði Rósu Bjarkar hefur verið mikil. En Rósa Björk, betra er seint en aldrei.
-sme
