SAMFÉLAG Vilhjálmur Bjarnason, þingmaður Sjálfstæðisflokks og fjárfestir, sagði í fréttaviðtali við Ríkisútvarpið í kvöld, að sér virtist sem þær bónusgreiðslur sem stjórnendur ALMC, áður Straums, fengi hafi verið komið undan nauðasamningum og þá stöðugleikaframlagi.
Hann sagði að sér þætti ekki rétt að verðlauna starfsmenn banka, sem fór í gjaldþrot, með þessum hætti og allt þetta stangist á við íslenska veruleika.
3,3 milljarða bónusar
Það var DV sem fyrst birti frétt um bónusgreiðslurnar og sagði meðal annars:
„Íslenska eignaumsýslufélagið ALMC, áður Straumur-Burðaráss fjárfestingabanki, hefur innt af hendi milljarða króna í bónusgreiðslur til um 20-30 núverandi og fyrrverandi starfsmanna félagsins. Voru bónusarnir, sem áætlað var í ársbyrjun 2015 að myndu nema samtals 23 milljónum evra, jafnvirði 3,3 milljarða íslenskra króna, greiddir út um miðjan desembermánuð á síðasta ári, samkvæmt heimildum DV.
Stærstur hluti bónusgreiðslnanna fór til aðeins nokkurra lykilstjórnenda ALMC og fengu þeir hver um sig jafnvirði mörg hundruð milljóna króna í sinn hlut.“
Mbl.is, sagði svo í upphafi fréttar um málið: „Milljarða bónusgreiðslurnar sem núverandi og fyrrverandi starfsmenn íslenska eignaumsýslufélagsins ALMC, sem áður var Straumur-Burðaráss, fengu í lok síðasta árs eru í takti við þróunina erlendis. Þetta segir fyrrum forstjóri bankans.“
„Jakob segir á að greiðslurnar séu í takti við bónusgreiðslukerfið sem var sett á fót á sínum tíma, þ.e. kaupaukakerfi sem var samþykkt á aðalfundi ALMC árið 2011. Þá bendir hann á að starfsmennirnir séu búnir að starfa lengi hjá félaginu
Straumur-Burðaráss var tekinn yfir af Fármálaeftirlitinu í mars 2009 og í kjölfar samþykktar nauðasamninga í júlí 2010 varð eignaumsýslufélagið ALMC til. Eftir samþykktina fengu kröfuhafar yfirráð í nýja félaginu en eigendurnir eru að stærstum hluta erlendir bankar og fjárfestingarsjóðir.“
Byggja skóla eða gera göng til Seyðisfjarðar
Aldís Hafsteinsdóttir, bæjarstjóri í Hveragerði, skrifaði um málið á Facebook: „Fauk illilega í mig þegar ég sá þetta. Hvaða rugl er þetta og hvað hefur fólk að gera með svona mikla peninga. Þetta er svo fáránlega absúrd að það tekur engu tali! Ætla þau að byggja íþróttahús í sinni heimabyggð eða gefa kannski eins og einn grunnskóla eða tvo leikskóla. Eða kannski enn betra útrýma einbreiðum brúm og gera göng til Seyðisfjarðar ? ? ?
Sett í samhengi við raunveruleikann er þetta svo mikil græðgi að það tekur engu tali!“
