Allt sem Katrín Jakobsdóttir gerir í ríkisstjórinni er að vaða úr einu í annað

Katrín Baldursdóttir:

Annað hvort hefur Katrín Jakobsdóttir opinberað í þessari ríkisstjórn að hún er í raun til hægri í stjórnmálum eða þá að hún er beitt ofbeldi af ráðherrum Sjálfstæðisflokksins og nú einnig Framsóknarflokksins. Hún þorir ekki í nein mál sem samráðherrar hennar hafa ákveðið, þó þau séu augljóslega og algjörlega í bága við allt sem Katrín hefur áður sagt. Nýjast er þetta brot á jafnréttislögum þegar Lilja Alfreðsdóttir ákvað að ráða flokksbróður sinn í starf ráðuneytisstjóra en ætlar svo í mál við konuna sem vogaði sér að kæra ráðninguna. Og hvað segir Katrín? Hún bara veður úr einu í annað og það sem er eftirtektarvert er að: „Lilja hafi upp­lýst hana um þá ákvörðun en hvað varðar efn­is­at­riði máls­ins vísar Katrín á mennta- og menn­ing­ar­mála­ráð­herra.“ Katrín vissi sem sagt fyrirfram af því að Lilja ætlaði í mál við konuna sem kærði og sagði bara já og amen.

Enn og aftur starfar Katrín í engu samræmi við það sem hún hefur sagt og lagt áherslu á. Hún hefur haft sig mikið í frammi um jafnréttismál sem heyra undir hana. Í tillögu frá forsætisráðherra um breyttan skipan ráðherra sem lögð var fyrir í fyrra segir: „Í ljósi aukins vægis jafnréttismála, áherslu ríkisstjórnarinnar á málaflokkinn, ákvæða jafnréttislaga um samþættingu jafnréttissjónarmiða við alla stefnumótun og áætlanagerð og þess hversu víða jafnréttismálin teygja anga sína þykir æskilegt að flytja málaflokkinn, a.m.k. tímabundið, til forsætisráðuneytisins á sérstaka skrifstofu jafnréttismála og endurspeglar breytingin áherslu sitjandi ríkisstjórnar á málaflokkinn.“

Á sama tíma og þetta er sagt er er kona dregin fyrir dómstóla vegna þess að hún vogaði sér að vísa máli sínu til kærunefndarinnar, sem hvað upp þann úrskurð að brotið hafi verið á henni.

Jafnrétti hvað! Hvað er Katrín að gera til dæmis fyrir láglaunakonur, konur af erlendum uppruna sem daglega mega þola misrétti, kúgun og ofbeldi á vinnustöðum og heima hjá sér? Afhverju er Katrín ekki búinn að koma upp alveg sérstakri stofnun sem hefur það að verkefni að taka á móti fólki af öllum kynjum og veita þeim stuðning í sinni baráttu gegn hvers konar misrétti og yfirgangi í leik og starfi?

Allt sem Katrín Jakobsdóttir gerir í þessari ríkisstjórn er að vaða úr einu í annað, taka ekki ábyrgð á neinu og standa ekki fyrir neitt sem hún hefur áður sagt. Í nánast öllum málum hefur Vg selt ömmu sína fyrir setu í ríkisstjórn. Þessi flokkur er ekkert orðinn nema það sem skrifað er á blaði.