Aldrei fleiri konur í sveitastjórnum

Jafnrétti Aldrei áður hafa, allavega hlutfallslega, setið fleiri konur í sveitastjórnum á Íslandi en nú. Við kosningarnar í fyrra fjölgaði þeim frá því að vera fjörutíu prósent kjörinna fulltrúa í 44 prósent.

Á vef Jafnréttistofu segir orðrétt: „Það vakti sérstaka athygli árið 2010 að hlutfall kvenna í sveitarstjórnum náði þeim áfanga að vera 40%. Í jafnréttislögum er einmitt kveðið á um að við „skipun í nefndir, ráð og stjórnir á vegum ríkis og sveitarfélaga skal þess gætt að hlutfall kynjanna sé sem jafnast og ekki minna en 40% þegar um fleiri en þrjá fulltrúa er að ræða“.

Þó að jafnréttislög nái vitaskuld ekki til kosninga í sveitarstjórnir er ljóst að hér hefur átt sér stað þróun í átt til aukins lýðræðis og jafnari áhrifa kynjanna í ákvarðanatöku á sveitarstjórnarstiginu. Þessu ber að fagna um leið og Jafnréttisstofa hvetur sveitarstjórnir til þess að huga sérstaklega að ákvæðum jafnréttislaga við skipan í nefndir og ráð. Jafnréttisstofa mun á næstunni taka saman upplýsingar um nefndir og ráð á vegum sveitarfélaga í því augnamiði að koma á framfæri athugasemdum við ranga skipan.“