„Aldís Hafsteinsdóttir, formaður Sambands íslenskra sveitarfélaga, sem fær um það bil 2.000.000 kr. á mánuði vill að ráðherrar og þingmenn sem í gær fengu launahækkun (ráðherrar upp á 127.000 krónur og þingmenn 70.000 krónur) setji lög á verkfall fólks sem tilheyrir lægst launaðasta hópi vinnuaflsins á Íslandi,“ skrifar Sólveig Anna Jónsdóttir, formaður Eflingar.
„Það er sú aðgerð sem Aldísi finnst gott veganesti inn í ástandið sem nú blasir við á íslenskum vinnumarkaði með fjöldauppsögnum, atvinnuleysi og öllum þeim óróa sem því mun fylgja: Lagasetning á ómissandi starfsfólk sem er aðeins að krefjast þess að geta skrifað undir sambærilegan samning og félagar þeirra hjá Reykjavíkurborg og ríki. Aldís blæs í rammfalskan herlúður, hún er ófær um að lesa ástandið.
Ég vona að kerfið geti haft vit fyrir Aldísi og ég vona að samninganefnd sveitarfélaganna sjái að það er ekkert annað í stöðunni en að ganga frá samningi við okkur, hratt og örugglega.“
