Katrín Jakobsdóttir forsætisráðherra reyndi að hafa áhrif á deilu ljósmæðra og ríkisstjórnar Katrínar. Katrín fundaði með ljósmæðrum sem nýttu fundinn til að segja Katrínu að þær undirbúi yfirvinnuverkfall. Engin lausn á deilunni kom fram, aðeins hertist hnúturinn.
Tuttugu og þrjár ljósmæður hafa sagt upp störfum og framundan er boðun verkfalls, sem hefst kannski eftir þrjár vikur. Afleiðingarnar eru löngu komnar langt frá öllu sem getur talist viðunandi eða ásættanlegt.
Ekki má efast um vilja forsætisráðherra til að leysa deiluna en hún er jafn valdalaus og áhrifalaus í málinu og Svandís Svavarsdóttir heilbrigðisráðherra og flokkssystir Katrínar. Lausnin er í höndum fjármálaráðuneytisins, þ.e. Bjarna Benediktssonar. Þaðan berast engar fréttir.
