Aftur er komið helvítis fokking fokk

Þetta er bara ekki hægt og eitthvað verður að gera. Meirihluti þingmanna hefur verið gripinn með lúkurnar á kafi í nammikrúsinni. Þar sem þeir troðfylla eigin vasa af sameiginlegum verðmætum okkar í heimildarleysi, en horfa á meðan á horaðan almúgann.

Meðan jafnvel illa fengnar sposlur þingmanna er skattfrjálsar gæta þeir sem best þeir geta að skerða lífeyrisþega um allt það sem fólk nær að afla sér. Króna á móti krónu systemið virkar ekki á þingmenn. Ó, nei.

Á sama tíma verður lögreglan uppvís að fádæma roluskap, viljandi eða óviljandi. Eina sem breytist er að meiri peningum verður varið til starfa þess fólks sem svaf á vaktinni. Enginn hættir, enginn tekur raunverulega ábyrgð. Allt verður eins.

„…er frænka Bjarna Benediktssonar, önnur náskyld Davíð Oddssyni…“

Á sama tíma er dómskerfið valtara en valt. Hvers vegna? Meðal annars vegna þessa: „Ein þeirra sem skipuð var landsréttardómari er frænka Bjarna Benediktssonar, önnur náskyld Davíð Oddssyni, þriðji er frændi Áslaugar Örnu Sigurbjörnsdóttur ritara Sjálfstæðisflokksins, fjórða er gift Brynjari Níelssyni þingmanni flokksins, fimmti kvæntur Ásdísi Höllu Bragadóttur fyrrverandi framkvæmdastjóra þingflokks Sjálfstæðisflokksins, og sjötti er fyrrverandi varabæjarfulltrúi Sjálfstæðisflokksins og svili Þorgerðar Katrínar Gunnarsdóttur. Sá síðastnefndi er sá eini sem hefur verið kjörinn pólitískur fulltrúi.“ Þetta er úr frétt frá Ríkisútvarpinu.

Og ekkert breytist og engu verður breytt.

„Tæplega 73 þúsund krónur í hverjum mánuði!“

Á sama tíma skilar okurleigufélag uppgjöri. Gunnar Smári Egilsson reiknimeistari alþýðunnar reiknaði og skrifaði svo þetta:

„Hér er leigufélag sem leigir út 1670 íbúðir í byrjun árs, bætir við 330 íbúðum yfir árið og leigir út í árslok 2000 íbúðir. Það jafngildir um 1835 íbúðum yfir allt árið. Af þessu verður til 2700 milljón króna hagnaður (tæplega 1,5 m.kr. á íbúð). Þar af eru 700 m.kr. tilkomnar vegna endurmats eigna en 1600 milljónir króna eru hagnaður vegna útleigu. Það gera 872 þúsund krónur á ári á hverja íbúð. Það er skatturinn sem láglaunafólk greiðir auðvaldinu á hverju ári, örfáum manneskjum sem hafa sölsað undir sig allan auð í samfélaginu. Tæplega 73 þúsund krónur í hverjum mánuði! Láglaunafólkið þrælar í tveimur og þremur vinnum við að geta haldið íbúðinni sinni og borgar í leiðinni hinum allra ríkustu 73 þúsund krónur um hver einustu mánaðamót! Hver bað um þetta óskapnaðarkerfi? Hvert er réttlætið í þessu? Af hverju er þessum glæpafyrirtækjum ekki lokað strax í dag og íbúðunum skipt á milli leigjendanna. Finnst ykkur það róttæk hugmynd? Hún er það alls ekki, þetta eru hin klassísku viðbrögð við sambærilegu lénskerfi og stjórnvöld hafa leyft að verða til á íslenskum húsnæðismarkaði.“

Þetta er ömurleg meðferð á fólki.

Það er ekkert minna helvítis fokking fokk nú en áður. Það er bullandi helvítis fokking fokk. Reyndar eykst það þegar stjórnarformaður* Samherja lækkar veiðigjöldin.

Sigurjón M. Egilsson.

*fyrrverandi að vísu.