Sigurjón Magnús Egilsson:
Þau ríkustu og stærstu hafa fundið leið. Þeir eiga viðskipti við banka í útlöndum þar sem krónan okkar kemur hvergi við sögu. Hið minnsta eru tvær þjóðir á Íslandi.
„Viðskiptabankarnir þrír, Íslandsbanki, Landsbankinn og Arion banki, hafa allir birt níu mánaða uppgjör sín og nemur samanlagður hagnaður þeirra ríflega 60 milljörðum það sem af er ári. Er það allt önnur staða en á sama tíma í fyrra þegar hagnaður þeirra var 10,6 milljarðar króna.“
Þetta er upphaf forsíðufréttar Moggans í dag. Ljóst er að bankarnir eru ekki framleiðslufyrirtæki. Þeir sýsla með peninga. Og græða óhóflega. Það eru ekki bara útlán bankanna sem skapa þennan hagnað. Sjálfur varð ég að breyta innheimtukröfum míns litla fyrirtækis. Ég var rukkaður um hvert og eitt einasta sem ég breytti sjálfur. Bankinn rukkaði mig óhikað fyrir mína eigin vinnu.
Samkvæmt Mogganum er þetta ekki búið: „Kvika banki á enn eftir að birta uppgjör sitt en miðað við afkomuviðvörun sem gefin var út fyrr í mánuðinum má gera ráð fyrir að hagnaður bankans muni nema um 8 milljörðum króna á fyrstu níu mánuðum ársins.“
Það er sem bankarnir fríspili í samfélaginu. Hirði af okkur eins mikla peninga og þeir framast kjósa. Og við getum ekkert gert.
Þau ríkustu og stærstu hafa fundið leið. Þeir eiga viðskipti við banka í útlöndum þar sem krónan okkar kemur hvergi við sögu. Hið minnsta eru tvær þjóðir á Íslandi.
