…nýjasta útspil hans sé hugsað sem skítapilla á Evrópusambandið…
Halldór Árni Sveinsson skrifaði:
Menn eru orðnir svo vanir stökkbreyttum asnagangi Trumps-vírusins, sem ku vera forseti Bandaríkjanna, að þeir kippa sér ekki lengur upp við órökrétt og fálmkennd uppátæki hans. Svona að öllu jöfnu, enda með lausnarmiðaða heilana frekar við klókar örverur og vírusa en kjána og örvita.
Þegar hann boðar til blaðamannafunda, er það þó oftast þannig að einhverjir þjóðfélagshópar eða jafnvel þjóðir verða fyrir afleiðingum bræði hans og hroka vegna illa ígrundaðra og fljótfærnislegra ákvarðana. Þannig hrukku menn illa upp – verr en við Grindavíkurskjálftann í morgun – við lokun á allt flug frá Evrópu til Bandaríkjanna.
Ekki eru liðnar tvær vikur síðan hann sagði að landar hans þyrftu ekki að hafa neinar áhyggjur af þessum kórónavírus, hann væri við öllu reiðubúinn, með ráð undir rifi hverju og allir innlendir aðilar samhæfðir og klárir í slaginn. Allt annað hefur komið í ljós, eins og reyndar allir aðrir en þessi kjáni óttuðust og vissu. Í fyrstu yfirlýsingunni sagðist hann reyndar stöðva allan vöruflutning frá Evrópu, en dró það til baka síðar, sennilega eftir að einhver með aðeins meira milli eyrnanna hefur bent honum á að Bandaríkin þörfnuðust þess sárlega á þessum tíma. Til dæmis drykkjarvatns frá Íslandi.
Kannski Gulli litli hafi manndóm og uppburð í sér…
Stjórnmálaskýrendur hér heima og vestanhafs gera því nú skóna að þetta nýjasta útspil hans sé hugsað sem skítapilla á Evrópusambandið og eigi jafnframt að lappa upp á laskaða ímynd hans heima fyrir, en þar sætir hann vaxandi gagnrýni fyrir aðgerðarleysi og ákvörðunarfælni við upphaf covid-19 faraldursins.
En hér heima urðu nokkrir eftirskjálftar af þessari ákvörðun Trumps. Bjarni Ben snöggreiddist, og Gulli litli generáll, sem hefur verið svo illa haldinn af meðvirknisveirunni Co-op 2019 þegar kemur að bandarískum málefnum að hann gat ekki einu sinni tjáð sig, margspurður, um háttsemi bandaríkjastjórnar að fyrirskipa aftöku á írönskum hershöfðingja í haust, krefst þess nú að vinur hans Mike Pompeo hringi tafarlaust í sig og flugbanninu verði aflétt nú þegar.
Öðru vísi mér áður brá. En batnandi mönnum er best að lifa. Kannski Gulli litli hafi manndóm og uppburð í sér að segja Pompeo garminum í leiðinni að hann geti gleymt því að ætla að koma með þúsundir NATÓ drengja hingað til lands í vor á einhverja viðamestu heræfingu sem skipulögð hefur verið. Og VG liðar í ríkisstjórninni hafi döngun í sér að benda samráðherrum í ríkisstjórninni á að heræfing á Íslandi sé ekki forgangsmál á þessum fordæmalausu tímum þegar „bandalagsþjóðir“ okkar í þessu ógeðfellda hernaðarbandalagi selji hergögn fyrir metupphæðir, m.a. til Sáda sem ætla að útrýma því sem eftir er af konum og börnum í Jemen.
Amen.
