Sérfræðingar margfaldast meðan heilsugæslan fær minna
- dæmi um að læknar fái greitt fyrir að vera ekki í annarri vinnu, en eru það samt.
Meðan íbúum höfuðborgarsvæðisins fjölgaði um ellefu prósent jókst framlag til heilsugæslustöðvanna um aðeins þrjú prósent. Hins vegar var borgað 57 prósentum meira til sérgreinalækna.
Þetta kemur fram í skýrsu Ríkisendurskoðunnar. Þar er sagt að ekki sé stuðlað að því að heilsgæslan verði fyrsti viðkomustaður sjúklinga. Úttektin nær til áranna 2007 til 2016.
Í úttektinni er einnig fjallað um hættu á hagsmunaárekstrum. Það er þegar læknar, sem starfa hjá Heilsugæslu höfuðborgarsvæðisins starfa einnig á Læknavaktinni ehf. og eru hluthafar þar.
„Slíkir árekstrar gætu aukist með nýju fjármögnunarkerfi sem tók gildi 1. janúar 2017. Samkvæmt því færist fé frá heilsugæslustöðvum til Læknavaktarinnar ef skjólstæðingar þeirra leita þangað. Þess má líka geta að læknar hjá Heilsugæslunni hafa fengið sérstakt helgunarálag sinni þeir ekki launuðu aukastarfi. Dæmi eru þó um að þeir séu á sama tíma starfsmenn Læknavaktarinnar. Ríkisendurskoðun telur brýnt að Heilsugæsla höfuðborgarsvæðisins taki þetta mál til skoðunar.“
-sme
