Látum ríkisstjórnina stjórna í mörg kjörtímabil. Gefum henni tækifæri til að breyta samfélaginu.
Haukur Anrþórsson.
Haukur Arnþórsson stjórnsýsfræðingur skrifaði þessa grein.
Þolinmóð hamingja! „Gleðileg jól! Það eru mörg tímamót núna. Ný ríkisstjórn tók við – sem við sýnum von, trú og kærleika. Fátt hefur þjakað Ísland meira en íhaldssemi bændaþjóðfélagsins – og hluti þess fór í útgerð eins og frægt er. En nú erum við loksins frjáls. Samfylkingin er hugurinn með jafnaðarstefnuna, Viðreisn er með sína þróuðu hægri stefnu og sér til þess að við höfum nóg að bíta og brenna og Inga er hjartað. Hið þríeina afl. Meðan Kristrún er harðjaxl og Þorgerður Katrín kannski sleggja þurfa þær að halda vel utan um hjartað í ríkisstjórninni. Það fylgir ekki alltaf skynseminni – eins og allir þekkja hjá sjálfum sér.
Við vinstri menn megum ekki…
Þetta eru gríðarleg tímamót og við þurfum að hugsa langt, mörg kjörtímabil fram í tímann. Enda þótt ríkisstjórnin taki til óspilltra málanna þá taka flestar breytingar mörg ár og jafnvel áratugi. Heilt ríki er nokkurn veginn á sjálfstýringu og erfitt að beygja og finna nýjan kúrs. En við þurfum þess við. Í upphafi verður aðeins það framkvæmt sem hægt er að gera hratt og vel – hitt mun vinnast hægt og sígandi. Til þess þarf þolinmæði.
Tökum dæmi um þolinmæði. Það þarf fimm ár til þess að stöðva hvalveiðar. Og það þarf mörg ár til að byggja húsnæði og leggja góða vegi. En við erum í langhlaupi.
Við þurfum að gefa ríkisstjórninni tiltrú og stuðning. Við vinstri menn megum ekki rjúka upp og fordæma allt og allt vegna þess að ríkisstjórninn mun standa föstum fótum á verðmætasköpun og framförum. Nú eru stjórnmálamennirnir okkar komnir með ábyrgð á herðarnar og verða að taka ákvarðanir eftir því. Aðrir sjá um upphlaupin og eru ábyrgðarlausir í stjórnarandstöðu, ekki við.
Látum ríkisstjórnina stjórna í mörg kjörtímabil. Gefum henni tækifæri til að breyta samfélaginu, stjórnmálunum og stjórnsýslunni og búa til framfarasinnað þjóðfélag. Við vitum að óvinir hennar munu rjúka upp og finna veika bletti – það eru alltaf veikir blettir, líka á okkur – en við þurfum að reka íhald, afturhald og þjóðrembu til baka.
Ríkisstjórnin stendur og fellur með því að við gefum henni líf.“
Miðjan valdi fyrirsögnina.
