Ég vil gera það sem ég get til að koma Sönnu á þing og vona að með þessu geti ég lagt hönd á plóginn.
Sólveig Anna Jónsdóttir.
Sólveig Anna Jónsdóttir skrifaði eftirfarandi:
Ég kynnist Sönnu Magdalenu árið 2016. Þá var ég ásamt öðrum að skipuleggja Róttæka sumarháskólann sem Viðar Þorsteinsson hafði stofnað árið 2011 og haldinn var hvert sumar. Sanna kom til okkar og hélt fyrirlestur um upplifun brúnna Íslendinga af blönduðum uppruna í íslensku samfélagi. Sanna er þeim fágæta eiginleika gædd að hafa einungis með því að vera á staðnum mikil áhrif á viðstadda; þegar hún er í herberginu verður allt bjartara, jákvæðara og betra. Þannig voru fyrstu áhrif hennar á mig. Ég heillaðist af þessari brosmildu, fallegu og greindu ungu konu. Stuttu seinna heyrði ég hana segja frá reynslunni af því að alast upp sem fátækt barn og ég hlustaði hugfangin. Þarna var komin manneskja sem að mótlætið hafði ekki brotið niður. Þvert á móti hafði það þroskað hjá Sönnu yfirvegun, staðfestu og samhyggð með öðru fólki.
Ég sendi Sönnu fyrst skilaboð á Facebook árið 2017. Þá bað ég hana að taka þátt í starfi flokks sem verið var að stofna, Sósíalistaflokksins. Ég var Eflingarkona í tveimur störfum, ásamt því að reka heimili, en ég vildi berjast fyrir betra og réttlátara samfélagi. Þá orku sem ég átti eftir vildi ég nota til þess. Betra samfélagi fyrir allar Eflingarkonur, og fyrir konur í sömu stöðu og Sanna og mammu hennar höfðu verið í. Mamma hennar Sönnu hafði einmitt unnið í sama leikskóla og ég vann í, og hafði verið tveggja vinnu kona. Og ég vildi fá að berjast við hlið Sönnu, frábærustu ungu konu sem að ég hafði kynnst, fyrir þessum markmiðum. Þessvegna sendi ég henni skilaboðin. Ég læt þau fylgja hér með.
Þann 26. apríl 2018 var ég kjörinn formaður Eflingar. Nákvæmlega mánuði síðar var Sanna kjörinn borgarfulltrúi Sósíalistaflokksins. Sanna var 26 ára gömul, og varð yngsti borgarfulltrúi í sögu Reykjavíkur. Ég man að ég hugsaði til mömmu hennar þegar úrslitin voru ljós, hvað hún hlyti að vera ótrúlega stolt af dóttur sinni.
Ef að Sanna Magdalega nær kjöri…
Nú er Sanna í framboði til Alþingis fyrir Sósíalistaflokkinn. Hún nýtur mikilla vinsælda sem borgarfulltrúi, mælist vinsælust allra borgarfulltrúa í hverri könnuninni á fætur annari. En hún er hugrökk og djörf og hefur þessvegna ákveðið að fara úr örygginu og taka pólitískan slag upp á von og óvon. Ég fagna þeirri ákvörðun og styð. Og hef þessvegna, eftir að hafa rætt mikið og oft við Sönnu, ákveðið að gefa kost á mér í þriðja sæti á lista flokksins í Reykjavík suður. Ég vil gera það sem ég get til að koma Sönnu á þing og vona að með þessu geti ég lagt hönd á plóginn.
Ég vona að þið viljið taka þátt í baráttunni. Ef að Sanna Magdalega nær kjöri sem þingmaður þá vitum við að landið okkar er á betri leið en það var. Það er til mikils að vinna. Tökum slaginn með Sönnu og berjumst sameinuð fyrir betra samfélagi.
Fyrirsögnin er Miðjunnar.
