Stjórnmál Sigurður Ingi Jóhannsson á eflaust bágt um þessar stundir. Flokkurinn hans tapar og tapar fylgi. Þegar leitað er til hans um skýringar telur hann upp eitt og annað. Nánast allt annað en eigin gjörðir. Ítrekað leitar hann skjóls hjá Pútín.
Segir Framsókn tapa fylgi þar sem stríð sé í Evrópu. Sem sagt, fylgishrun Framsóknar er nánast öllu öðru um að kenna en gerðir, skoðanir og framkoma formannsins. Fjármálaráðherrans.
Mér hefur verið sagt að Sigurður Ingi sé rammur af afli og frábær dýralæknir. Sem er eflaust rétt.
„Stúdentspróf MR 1993. Skiptinám í stjórnmálasögu Austur-Asíu við Ewha University, Seúl, 1993–1994. BA-próf í stjórnmálafræði frá HÍ 1998. Skiptinám í þjóðhagfræði og heimspeki við Minnesota University 1998. Meistaragráða í alþjóðahagfræði frá Columbia University, New York, 2001.“
Það er lágskýjað hjá Sigurði Inga og Framsókn.
Hvað ætli þetta sé? Þetta á ekki við Sigurð Inga. Nei, aldeilis ekki. Þarna er vitnað í námsferil Lilju Alfreðsdóttur varaformanns Framsóknar. Hefði ekki verið farsælla að hún hefði orðið fjármálaráðherra. Með fullri virðingu fyrir Inga, eins og hann er einatt kallaður á hans heimaslóðum.
Sé rétt munað er Jón Baldvin menntaður í alþjóðahagfræði. Hann sagðist hafa menntað sig til forsætisráðherra, sem hann varð aldrei.
Ætli Sigurður Ingi finni fyrir minnimáttarkennd. Lilja klárari en hann og það sem verst er af öllu vondu. Miðflokkur Sigmundar Davíðs mælist með tvöfalt fylgi á við Framsóknarflokkinn.
Það er lágskýjað hjá Sigurði Inga og Framsókn. Fari sem stefnir er stutt í að Framsókn berjist við að halda sér lifandi.
Já, hann Pútín.
-sme
