Alþingi „Framkoma ráðherra Vinstri grænna er fordæmalaus í þessu máli. Hagsmunum alþýðunnar, starfsfólks og fyrirtækja er fórnað á altari málstaðar sem engar forsendur eru fyrir. Stjórnarskrárvarin réttindi starfsmanna og fyrirtækja fótumtroðin með fordæmalausum hætti. Það er hægt að spyrja: Hvað næst? Tilgangurinn virðist helga meðalið,“ sagði Jón Gunnarsson í umræðu um vantrauststillögu gegn Bjarkeyju Olsen Gunnarsdóttur.
Orð Jóns, sýna kannski best hvert ástandið er á stjórnarheimilinu.
„Eftir sneypuför fyrrverandi ráðherra í fyrra, skýra niðurstöðu umboðsmanns Alþingis, eindregnar ráðleggingar sérfræðinga ráðuneytisins hefði maður haldið að fólk sæi að sér. Aðgerðir og aðgerðaleysi núverandi ráðherra er alvarlegra fyrir bragðið. Í rökstuðningi ráðherra blasir síðan við blekkingaleikur, til að mynda það að réttlætingin sé að Kristján Þór Júlíusson hafi veitt leyfi í júlí 2019, mörgum mánuðum eftir umsókn, þegar hið rétta er að Kristján Þór Júlíusson, hæstvirtur ráðherra á þeim tíma, gaf út reglugerð um hvalveiðar 19. febrúar það sama ár og þá lá auðvitað fyrir að leyfið yrði gefið út. Það þurfti síðan ekki á leyfinu halda. Það lá ekkert á því vegna þess að það átti ekki að stunda hvalveiðar þetta ár. Svona blekkingaleikur er hugsaður til þess að villa um fyrir fólki,“ sagði Jón.
Hér er hægt að lesa alla ræðu Jóns Gunnarssonar frá 20. maí í vor.
