Leiðari Katrín Jakobsdóttir fórnaði mestu af eigin fylgi og vinsældum þegar hún og hennar flokkur gengu til liðs við Sjálfstæðisflokkinn 2017 og svo aftur 2021.
Katrín sagði oftar en einu sinni að Bjarni Benediktsson væri sinn besti samstarfsmaður. Í öllu baslinu sem Bjarni kallaði hefur staðið og orkað hefur tvímælis fór aldrei svo að það veikti ekki það fólk sem næst honum stóð.
Katrín stillti sér upp við hlið Bjarna. Stóð fast honum við hlið. Þegar Bjarni stappaði í hverjum drullupollinum á eftir öðrum gat aldrei farið á annan veg en að slettist duglega á Katrínu.
Katrín beið í raun afhroð í forsetakosningunum. Nánast öll svo kölluð „fyrirmenni“ Íslands voru með henni í liði. Víst er að það hjálpaði Katrínu ekki. Bara alls ekki. Sum „fyrirmennin“ hafa eftir kosningar skrifað greinar þar sem leiðindin eru nánast endalaus.
Í raun átti Katrín enga von um að verða forseti Íslands. Leiddi sérlega óvinsæla ríkisstjórn, flokkurinn kominn á líknardeild og allt í hinu mesta klandri.
Fólkið velur forsetann. Ég kaus ekki Höllu og ekki Katrínu. Halla Tómasdóttir er rétt kjörinn sem sjöundi forseti Íslands. Katrín átti í upphafi að hugsa um á hvaða sprengjusvæði hún var í nánu samstarfi við Bjarna. Munum að, að hver dregur dám af sínum sessunaut.
-sme
