„Hvers lags kerfi er þessi ríkisstjórn með? Ég spyr: Hversu illa veik er þessi ríkisstjórn sem lætur svona viðgangast?“
Guðmundur Ingi Kristinsson.
Alþingi „Stefnuleysi og úrræðaleysi ríkisstjórnarinnar í heilbrigðismálum veldur veiku fólki óbætanlegu tjóni. Þú ert númer 99 í röðinni. Nei, fyrirgefðu, þú ert nr. 499 í röðinni. Nei, þú ert ekki á biðlista, þú varst allt of seinn að panta tíma hjá heimilislækni. Hvað þá? Jú, þú getur reynt einu sinni í mánuði á tveimur, þremur tímum að panta tíma hjá heimilislækni og ef það tekst ekki þá er bara að reyna í næsta mánuði á eftir,“ sagði Guðmundur Ingi Kristinsson, Flokki fóksins, á Alþingi fyrir skammri sstund.
„Ef þér tekst að panta á þessum tíma þá máttu þakka fyrir að fá tíma hjá heimilislækninum eftir einn og hálfan til tvo mánuði. Ef það tekst ekki þá líða þrír, fjórir mánuðir þangað til viðkomandi á möguleika á fá að tala við lækni. Hugsið ykkur kerfi þar sem þú þarft að vakna eldsnemma, rjúka í símann og þú getur þurft að vera í símanum í einn til tvo tíma, aldrað fólk, fatlað fólk. Til hvers? Bara til að fá tíma hjá lækni. Hvers lags kerfi erum við búin að búa til? Og spáið í það sem skeði hér nýlega; fótbrotinn einstaklingur í bráðabirgðagifsi. Hvað var gert við viðkomandi? Jú, hún var bara send út af spítalanum og í bið. Viðkomandi var bryðjandi verkjalyf, með óbærilegar kvalir í viku og spyr þá: Hvenær kemur að því að ég fái að fara í aðgerð? Svarið var: Þú ert ekki á biðlista. Þú ert ekki einu sinni á listanum. Hún fer til Spánar og fær aðgerð tveimur, þremur tímum eftir að hún lenti á Spáni.“
Guðmundur Ingi endaði ræðu sína svona:
„Hvers lags kerfi er þessi ríkisstjórn með? Ég spyr: Hversu illa veik er þessi ríkisstjórn sem lætur svona viðgangast? Hún er kannski á bið eftir lækningu.“
