„Þess vegna eru innviðirnir á Íslandi sprungnir og við getum ekki haldið áfram að senda út þau skilaboð að við ætlum að gera mest af öllum.“
Bjarni Benediktsson utanríkisráðherra.
Alþingi
„Þá vitum við það. Ráðherra er tilbúinn að bjarga konum og börnum frá aðstæðum sem Alþjóðadómstóllinn hefur lýst áhyggjum af að geti talist þjóðarmorð ef hann fær eitthvað í staðinn. Mannslíf eru í húfi og ráðherrann vill kreista loforð út úr Vinstri grænum og Framsókn um að þau gefi eftir þá litlu mannúð sem eftir situr á þeim bænum eftir sex ára samstarf við Sjálfstæðisflokkinn til að bjarga þeim. Auga fyrir auga, tönn fyrir tönn. Þetta er ekki boðlegt, virðulegi forseti. Það er ekki boðlegt að ráðherra í ríkisstjórn Íslands sé tilbúin að víla og díla með mannslíf sem pólitíska skiptimynt. Það er skömm að þessu,“ sagði Þórhildur Sunna Ævarsdóttir á Alþingi fyrr í dag.
Bjarni Benediktsson utanríkisráðherra brást svona við:
„Það er alrangt að við höfum ekki verið að gera nægilega mikið, að við höfum ekki sýnt mannúð og mildi og tekið tillit til hörmulegra aðstæðna. Þetta er allt saman alrangt. Vandinn er hins vegar sá að við höfum ekki horfst í augu við afleiðingar þess að ganga of langt í þessum málaflokki. Þess vegna eru innviðirnir á Íslandi sprungnir og við getum ekki haldið áfram að senda út þau skilaboð að við ætlum að gera mest af öllum,“ sagði utanríkisráðherrann.