Er ekki flokkur sem kallar sig róttækan vinstri flokk kominn beinlínis út á tún að skíta þegar forystumenn leggja á borð svona tillögur þvert á hag almennings?
Sigurjón Þórðarson.
Sigurjón Þórðarson, varaþingmaður Flokks fólksins, skrifar:
Vg hefur enn á ný afhjúpað sig sem hagsmunavörð örfárra auðmanna í nýjum drögum Svandísar Svavarsdóttur að frumvarpi um sjávarútvegsmál. Frumvarpið býður þeim sem hafa farið á svig við núverandi lög og farið upp úr kvótaþakinu, að auka samþjöppun í greininni enn frekar.
Á hinn bóginn þá kemur skýrt fram í frumvarpinu að hún vilji þrengja enn frekar að færabátum sem skila verðmætasta aflanum á land með því að koma í veg fyrir að strandveiðibátar geti landað ufsa án þess að það dragist frá naumt skömmtuðum strandveiðiskammtinum í þorski.
Svandís lætur ekki þar við sitja…
Það er erfitt að skilja þessi áform Svandísar nema út frá illvilja gagnvart smábátaveiðum, þar sem reglan er að útgefinn ufsakvóti er ekki veiddur. Ef allt væri eðlilegt þá væru ufsaveiðar gefnar frjálsar a.m.k. þegar líða tæki á fiskveiðiárið og fyrirséð að ráðlagður afli næðist ekki.
Nei, nei Svandís lætur ekki þar við sitja í að herða að þeim litlu í greininni, heldur opnar hún á þann möguleika að þrengja enn frekar að því almenningur geti veitt sér til matar og jafnvel bannað það.
Er ekki flokkur sem kallar sig róttækan vinstri flokk kominn beinlínis út á tún að skíta þegar forystumenn leggja á borð svona tillögur þvert á hag almennings?