Sigurjón Magnús Egilsson:
Framsóknarflokkurinn hefur nánast verið notaður sem eldiviður á ófriðarbál ríkisstjórnarinnar.
Þegar Bjarni Benediktsson ákvað að hætta sem fjármála- og efnahagsráðherra lét hann Katrínu Jakobsdóttur forsætisráðherra vita af ákvörðun sinni. Bjarni lét Sigurð Inga Jóhannsson formanni Framsóknar ekki vita um hvað stæði til.
Þegar fjölmiðlar leituðu til Sigurðar Inga vegna ákvörðunar Bjarna sagði hann nánast alltaf það sama. Hann hafði ekkert heyrt og við engan talað áður en hann heyrði og sá í fjölmiðlum hvað Bjarni var að gera. Hvorki Bjarni né Katrín hirtu um að láta formann Framsóknar vita. Mjög lúalegt.
Þegar Bjarni ákvað svo upp á sitt einsdæmi að Ísland sæti hjá við tillögu um vopnahlé á Gaza vara sama uppi á teningum. Deilt er um með hversu stuttum fyrirvara Bjarni lét Katrínu vita. Mínútuslagur þeirra er nú opinber öllum.
Enn og aftur var formaður Framsóknar skilin eftir. Fékk ekkert að vita. Vissi ekkert hvað stóð til og kom af fjöllum þegar leitað var til hans. Enn og aftur var Sigurður Ingi og Framsókn skilin eftir á víðavangi. Mjög lúalegt.
Framsókn verður að þola leiðindin sem þeim er sýnd. Miðað við nýjustu skoðanakannanir, og gangi þær eftir, mun meirihluti þingflokks Framsóknar missa sín þingsæti. Flokkurinn hefur nánast verið notaður sem eldiviður í ófriðarbáli ríkisstjórnarinnar.
