Á sama tíma er unga fólkinu sendur aukareikningur upp á 200.000 kr. á mánuði í heimabankann og tilgangurinn er að láta unga fólkinu blæða út fjárhagslega hægt og rólega.
„Vegna fjárhagslegra hryðjuverka með ofsatrú á stýrivaxtahækkunum að vopni er staða heimilanna að versna og versna í boði ríkisstjórnar og Seðlabanka. Þeim er alveg sama hvað hið fjárhagslega ofbeldi þeirra drepur niður. Stefnan er að ganga milli bols og höfuðs á ungu fólki sem í góðri trú keypti sér íbúð í lágvaxtalandinu Íslandi, sem var þeirra blekking. Þá er búið að gera leigumarkaðinn að fjárhagslegu sprengjusvæði þar sem 200–300 manns reyna í örvæntingu að fá hverja einustu íbúð og þetta á bara eftir að versna í boði stjórnvalda. Hryðjuverkalausn þeirra er að stöðva framkvæmdir á húsnæðismarkaði, til að stöðva hækkun á íbúðamarkaði. Hvernig komust stjórnvöld og Seðlabankinn að þessari fáránlega heimskulegu niðurstöðu? Jú, þau nota það eina tól sem þau þekkja, gervigreind. Til að sleppa við mannlegar tilfinningar virðist sem ríkisstjórnin og Seðlabankinn hafi kveikt á gervigreindinni,“ sagði Guðmundur Ingi Kristinsson Flokki fólksins.
„Þegar litið er til þessara kaldranalegu stjórnarhátta stjórnvalda gagnvart fjölskyldum, ungu fólki, öldruðu fólki og öryrkjum virðist mennskan víðsfjarri og ákvarðanatökur og gervimennska hjá gervistjórnvöldum virðist hafa tekið völdin á Íslandi. Bankar og fyrirtæki græða á tá og fingri. Á sama tíma er unga fólkinu sendur aukareikningur upp á 200.000 kr. á mánuði í heimabankann og tilgangurinn er að láta unga fólkinu blæða út fjárhagslega hægt og rólega. Stjórnvöld hlusta ekkert, heyra ekkert, sjá ekkert, gera ekkert nema gefa Seðlabankanum fullt og ótakmarkað fjárhagslegt skotleyfi á almenning í formi ofsatrúar á stýrivaxtahækkanir hans. Verðbólgumælingar eru ekki náttúrulögmál heldur mannanna verk og því er ekkert auðveldara en að taka íbúðamælingar út úr henni, festa vexti og endurskoða verðbólgumælinguna þannig að hún mælist rétt,“ sagði Guðmundur Ingi.
„Að gefnu tilefni hefur verið boðað til mótmæla á Austurvelli um næstu helgi vegna aðgerðaleysis stjórnvalda og Seðlabankans og vonandi mæta sem flestir þangað því að oft var þörf en nú er nauðsyn. Að gefnu tilefni: Ríkisstjórn, hættið að skatta fátækt.“
