Ásta Guðrún Helgadóttir, þingkona Pírata, hefur lagt þrjár spurningar fyrir Benedikt Jóhannesson, fjármála- og efnahagsráðherra. Meðal annars spyr Ásta Guðrún hvort ráðherranum þyki nauðsynlegt að bjóða upp á endurgreiðslu á virðisaukaskatti.
Hinar spurningar tvær eru hver sé afstaða ráðherrans til endurgreiðslu á virðisaukaskatti til ferðamanna og hvort hann telji að hækka eða lækka eigi endurgreiðsluna.
Á forsíðu viðskiptablaðs Morgunblaðsins í dag er frétt um endurgreiðslur á virðisaukaskatti til ferðafólks. Þar segir að í janúar, í ár, hafi tollfrjáls viðskipti ferðafólks numið 280 milljónum króna, sem er langtum meira en áður í janúar, var 155 milljónir í fyrra og 104 milljónir árið þar áður. „Árið 2015 voru heildarviðskiptin rúmlega 2,5 milljarðar og í fyrra nam þessi tala tæplega 4,2 milljörðum,“ segir í viðskiptablaði Morgunblaðsins.
