Koma svo strákar, finnið þá gellu og þið getið andað léttar.
Sólveig Anna Jónsdóttir.
Sólveig Anna Jónsdóttir skrifaði:
„Nú gerast menn innan Alþýðusambands Íslands mæðulegir mjög. Sú staða dregst upp að eintómir karlar stillist upp í forystusveit hins merka og sögulega fyrirbæris á þinginu sem að haldið verður í lok apríl-mánaðar. Ég get ekki annað en fundið til meðaumkunar yfir karl-armæðunni. Og það sem gerir þetta allt enn meira armæðandi er að formaður Eflingar, annars stærsta verkalýðsfélags landsins með 28.000 meðlimi, tvíkjörin af félagsfólki, er svo hræðilegt fyrirbæri sem raun ber vitni. Annars væri sú komma-lufsa mögulega brúkleg til að hjálpa köllunum að laga kynjaskiptinguna. En alas, forkvenmaðurinn sá er svo voðalega karllægur að það er ekki hægt að hugsa sér það.
Við verðum bara að vona að karlarnir gefist ekki upp. Líkt og kveðið var forðum: Leitið og þér munið finna: Einhversstaðar er ókarllæg kona með veikt umboð sem lítið fer fyrir. Koma svo strákar, finnið þá gellu og þið getið andað léttar.“
Af fréttum dagsins að marka er gert ráð fyrir að Finnbjörn Aðalvíkingur Hermannsson verði næsti forseti ASÍ, Kristján Þórður Snæbjarnarson fyrsti varaforseti og Vilhjálmur Birgisson annar varaforseti.
