Nú er hann ríkisendurskoðandi og ráðinn af Alþingi Íslendinga en virðist þjóna Bjarna Benediktssyni og stjórnarliðum í Framsóknarflokknum, auðsveipur þeim sem sköffuðu honum fína vinnu.
Jóhann Hauksson skrifaði:
Ofstækisfull afstaða núverandi ríkisendurskoðanda, Guðmundar Björgvins Helgasonar, gegn rétti almennings til upplýsingar í Lindarhvolsmálinu er furðuleg. En hún upplýsir að hann er ekki embættismaður í þjónustu almennings heldur þjónar hann sínum herrum, sem réðu hann til verka sem ríkisendurskoðanda. Upphaflega var hann ráðinn til Guðna Ágústssonar þáverandi landbúnaðarráðherra árið 2000 og þjónaði honum í sjö ár. Nú er hann ríkisendurskoðandi og ráðinn af Alþingi Íslendinga en virðist þjóna Bjarna Benediktssyni og stjórnarliðum í Framsóknarflokknum, auðsveipur þeim sem sköffuðu honum fína vinnu.
Hvernig getur maður í embætti sem sérstaklega á að þjóna almenningi og skattgreiðendum og hafa á eftirlit með því að vel sé farið með almannafé gengið fram með slíkum hætti? Ég veit að stofnandi Sjálfstæðisflokksins, Jón Þorláksson sagði á prenti 1928 að engum væru veitt lyklavöld að ríkisféhirslum til að greiða úr þeim vinargjafir eða fylgdarlaun.
Þessi maður virðir regluna „æ sér gjöf til gjalda“ og greiðir nú fyrir sig með ofstopa gegn skattgreiðendum í þágu Bjarna Ben og annarra stjórnarliða með því að hamast gegn því að Lindarhvolsskýrsla Sigurðar Þórðarsonar verði birt.
Þetta er frumstætt og spillt. Meira að segja vígi almennings sem eiga að verja skattgreiðendur gegn ofríki framkvæmdavaldsins eru „infiltreruð“ mönnuð einhverjum leiguliðum stjórnarherranna.
Svei þessu.
