Þrátt fyrir að hafa starfað í sama húsi í mörg ár hafa þeir Bjarni Benediktsson og Björn Leví Gunnarsson aldrei talast við. Þetta kom fram í Kryddsíldinni í gær. Farinn var jákvæðishringur í þættinum. Það kom í hlut Björns Leví að hrósa Bjarna. Hann sagði þetta meðal annars: „Ég kann að meta fólk sem kann að spila leiki. Og Bjarni kann tvímælalaust að spila leikinn, hann er rosalega góður í því og ég ber virðingu fyrir því.“
Sigmundur Davíð fékk það hlutskipti að hrósa Birni Leví. SDG sagði: „Svo verð ég eiginlega að hrósa honum, þó mér sé það nánast þvert um geð, fyrir ákveðna þvermóðsku. Maðurinn er mjög þrjóskur og neitar til dæmis að ganga í skóm, neitar að setja á sig bindi en maður verður að bera ákveðna virðingu fyrir þeirri þrautseigju; að láta ekki segja sér til og vera eins og maður er.“
