Yfirlýsingar um ónóg fylgi Sjálfstæðisflokksins undir forystu Bjarna eru í augum undirritaðs barnalegar.
Hjörleifur Guttormsson, fyrrverandi ráðherra fyrir Alþýðubandalagið, skrifar langar grein í Mogga dagsins. Þar lýsir hann yfir stuðningi við Bjarna Benediktsson í formannskjörinu.
„Framboð Guðlaugs Þ. Þórðarsonar til formennsku í Sjálfstæðisflokknum hefur komið mörgum á óvart, einnig innan hans eigin flokks. Formlegur aðdragandi slíks framboðs gat ekki skemmri verið og ólíkar málefnaáherslur innan flokksins og gagnrýni á störf Bjarna Benediktssonar sem formanns til margra ára liggja ekki á lausu. Yfirlýsingar um ónóg fylgi Sjálfstæðisflokksins undir forystu Bjarna eru í augum undirritaðs barnalegar, m.a. með vísan í verulega hærra kjörfylgi fyrir hrun. Ég hef verið óflokksbundinn í áratug, en stuðningsmaður ríkisstjórnar Katrínar Jakobsdóttur frá því hún var mynduð haustið 2017. Þar hafa formenn flokkanna þriggja verið kjölfestan, sem væri augljóslega rofin án forystu Bjarna Benediktssonar í stærsta stjórnarflokknum.“
