„Hann hefur oft verið til fyrirmyndar, skemmt fólki, afrekað frábæra hluti og alla tíð verið góður bróðir“

Ingólfur Þórarinsson tónlistarmaður, betur þekktur sem Ingó Veðurguð, fagnar 36 ára afmæli sínu í dag. Áfanganum fagnar hann í stormi ásakana um ósæmilega og brotlega hegðun gagnvart fjölda ungra stúlkna og í gær tapaði hann meiðyrðamáli þar sem hann krafðist bóta fyrir ummælum um að hann hafi ítrekað sofið hjá börnum í gegnum árin.

Guðmundur Þórarinsson, tónlistarmaður og landsliðsmaður Íslands í knattspyrnu, bróðir Ingós, skrifar falleg orð á Instagram um Veðurguðinn bróður sinn. Um Ingó hefur Guðmundur þetta að segja:

„Hann hefur marga fjöruna sopið og ekki alltaf verið til fyrirmyndar og farið rétt með sína velgengni á sínu sviði. Hann er samt ekki barnaníðingur né nauðgari og það er ekki í lagi að hópur af fólki kasti slíku fram á netið án sannana aftur og aftur,“ segir Guðmundur og bætir við:

„Málefnið er flott en það þarf heilbrigða einstaklinga til að stjórna þeirri umræðu. Hann hefur oft verið til fyrirmyndar, skemmt fólki, afrekað frábæra hluti og alla tíð verið góður bróðir. Sem náinn aðstandandi að horfa upp á þetta hefur oft verið óraunverulegt og mjög erfitt.

Ég gef engan afslátt við hann (eða aðra vini og vandamenn) þegar kemur að hans breyskleika og baráttu við sjálfan sig. En fólk á ekki að fá að kalla annað fólk hvað sem er á netinu eins og ekkert sé.“