Þórður Már Jónsson lögmaður segist hættur að láta Cosco gera sig að fífli. Verðlagning verslunarinnar hafi vissulega lofað góðu í upphafi en nýleg viðskipti lögmannsins hafi sannarlega sýnt fram á hið gagnstæða.
Þórður segir frá upplifun sinn í færslu á Facebook. Þar segir lögmaðurinn:
„Að láta hafa sig að fífli: Ég fór í Costco fyrir nokkrum dögum með dóttur minni. Ég er löngu búinn að sjá hversu stórhættulegt er að versla þar ef maður passar sig ekki. Það eru mjög margar vörur þar sem eru rándýrar, mikið dýrari en annars staðar, fyrir utan að maður þarf að kaupa mjög mikið magn. Leggjum svo árgjaldið ofan á. Þetta var flott í byrjun en seig hratt á ógæfuhliðina,“ segir Þórður og heldur áfram:
„Eitt af fjölmörgum dæmum sem ég hef séð er þetta: Að kaupa 5 Doritos poka á 1.229 krónur, sem gerir 246 krónur stk. En ef maður kaupir sama snakk í stykkjatali í Krónunni greiðir maður 196 kr. stk. Maður þarf sem sagt að greiða Costco aukalegar 50 kr. stk. fyrir að fá að kaupa í miklu magni og 250 kr. í heildina. Einu sinni hélt ég að þetta væri öfugt, að maður fengi mun betri verð fyrir magnkaup en ekki öfugt. En svona er þetta með mjög margar vörur í Costco. Er kominn með ógeð af Costco og nenni þeim ekki lengur.“