„1500 tonn af þorski fengust í skiptum fyrir 5,3% af deilistofnum sem Íslendingar hafa rétt til að veiða. Ég á enn eftir að taka ákvörðun um hvernig þetta verður útfært en ljóst er að það er svigrúm til að bæta inn í strandveiðipottinn líkt og ég hafði vonast til að geta gert. Strandveiðar skipta miklu máli fyrir byggðir landsins og það stendur mér nærri að standa vörð um það kerfi samhliða því að hvika hvergi frá því grundvallarsjónarmiði að fylgja vísindalegri ráðgjöf,“ skrifar Svandís Svavarsdóttir sjávarútvegsráðherra.
Meðal þeirra sem hafa hvað harðast gagnrýnt Svandísi, áður en til þessa kom er Sigurjón Þórðarson, fyrrverandi þingmaður. Hann fagnar: „Gott mál að eitthvað skuli aukið í strandveiðarnar, en það er auðvitað ekkert vísindalegt við ráðgjöf Hafró, sem tekur hvorki mið af né svarar málefnalegri gagnrýni.“
Álfeiður Eymarsdóttir hefur einnig gagnrýnt Svandísi. Hún skrifar núna: „Frábært Svandís, endilega komdu með sem mest inn í strandveiðarnar -það er svo mikill skítafnykur af byggðakvótanum sem er kominn að miklu leyti í hendur stórútgerða.
Ég skora á þig að tryggja 48 daga á bát í sumar án stöðvunarheimildar.
Strandveiðikerfið í heild er minna en 2% úthlutaðs heildarkvóta. Það er veitt svo mikið framyfir ráðgjöf á hverju ári, að meðaltali sl. 10 ár sem nemur einu strandveiðikerfi -að það skiptir engu máli þó handfæraveiðar klárist án stopps. Veiðigetan er svo lítil að það er smotterí miðað við hvað stóru skipin fara framúr á hverju einasta fiskveiðiári. Ég er með tölur fyrir þig sem styðja þessa staðhæfingu mína.
Kv.
Alfa, stjórnarmaður í nýstofnuðu Strandveiðifélags Íslands.“
