Mannlíf Reykjavík 1985-1990 er yfirskrift sýningar Húberts Nóa Jóhannessonar sem verður opnuð í Gallerí Gróttu fimmtudaginn 11. febrúar kl. 17. Á sýningunni eru nokkur verka Húberts Nóa sem unnin eru á þessum árum og hafa sum þeirra ekki verið sýnd áður opinberlega. Verkin eru af stöðum í Reykjavík sem málaðir eru eftir minni, en strax á námsárum sínum var sú nálgun að leiðarstefi listamannsins.
Á þeim tíma, sem verkin vísa til, kom upp á yfirborðið stefna í myndlist er nefndist neo geo eða ný geometria, sem er m.a. kennd við listamennina Helmut Federle, John Armleder, Gerwald Rockenschaub og Franz Graf. Áhrifa stefnunnar gætti talsvert hjá ungum myndlistarmönnum sem voru að hasla sér völl á Íslandi um miðjan níunda áratuginn og margir snérust á sveif með henni einkum eftir gestakennslu Helmuts Federle við MHÍ 1984.
Myndlistarmaðurinn Húbert Nói felldi þessa stefnu að sínum myndheimi þar sem borgarumhverfi og landslag er einfaldað í geometrisk form. Framsetning og viðfangsefni eru persónuleg en sjálfsprottin nálgun við listsköpun var ein meginstefna í hugmyndafræði nýja málverksins og pönksins, sem voru nánast samtíða neo geo stefnunni.
Sýningin stendur til 4. mars.
Gallerí Grótta er staðsett á Eiðistorgi, 2. hæð.
Opið mánudaga – fimmtudaga 10-19 og föstudaga 10-17.
