Gunnar Smári:
„Sósíalistar geta því stækkað í allar áttir, eru ekki með nein mein í samsetningu félaga eða stuðningsfólks.“
„Þarna sést að Sósíalistaflokkurinn er stærri en Flokkur fólksins, Píratar, Viðreisn og VG í Norðvestri og stærri en Viðreisn, Píratar, Flokkur fólksins og Miðflokkur í Norðaustri. Það eru nokkur tíðindi, einkum varðandi Norðaustur þar sem Sigmundur Davíð er oddviti Miðflokks en Sósíalistar hafa ekki kynnt sinn lista. Miðað við þessa skiptingu næði Sigmundur ekki því að verða kjördæmakjörinn en Sósíalistaflokkurinn næði inn manni í Norðaustri,“ skrifar Gunnar Smári.
„Í skiptingu milli kjördæma og kynja sem Mogginn hefur verið að sýna hefur komið fram að Sósíalistaflokkurinn nær jafnt til beggja kynja og nokkuð jafnt út í öll kjördæmi. Hann er því ekki með neina innbyggða skekkju, eins og t.d. Píratar og Viðreisn sem eru háðir fylgi sínu á suðvesturhorninu og mótast af því, eiga erfitt með að sækja fylgi út fyrir það. Flokkar sem sækja fylgi sitt einkum til karla (Viðreisn, Sjálfstæðisflokkur) eða kvenna (VG og Samfylking) geta lent í sambærilegri klemmu, vilji til að halda í grunnfylgið aftrar sókn út fyrir það eða að sókn út fyrir grunnfylgið getur dregið úr kjarnafylginu.
Þegar fylgiskannanir eru skoðaðar eftir aldri, menntun, tekjum og slíkum þáttum kemur það sama í ljós, sósíalistar sækja fylgi nokkuð jafnt til allra, en síst reyndar til hinna tekjuhæstu. En Sósíalistar ná vel til hinna yngstu og elstu, ná vel til hinna tekjulægstu og þeirra með minnsta menntun (sem VG og Samfylkingin gera ekki lengur), ná jafnt til höfuðborgar og landsbyggðar og vel til allra kynja. Sósíalistar geta því stækkað í allar áttir, eru ekki með nein mein í samsetningu félaga eða stuðningsfólks,“ skrifar Gunnar Smári sem formaður framkvæmdastjórnar Sosíalistaflokksins.
