„Borgarsjóður er yfirskuldsettur og áætlað er að taka 34 milljarða króna rekstrarlán á árinu. Þá er farið í þetta rugl sem lýsir best mikilmennskubrjálæði. Reykjavíkurborg er eins og áður segir ekki hugbúnaðarfyrirtæki heldur sveitarfélag,“ bókaði Vigdís Hauksdóttir á fundi borgarráðs.
Tilefnið var að óskað var eftir að borgarráð heimili að hefja innkaupaferli vegna endurnýjunar á netskápum og netskiptum á starfsstöðvum borgarinnar, ásamt trúnaðarmerktum fylgiskjölum.
„Reykjavíkurborg er ekki hugbúnaðarfyrirtæki. Reykjavíkurborg er sveitarfélag sem samkvæmt sveitarstjórnarlögum ber að halda uppi lögbundinni þjónustu og grunnþjónustu. Sú þjónusta er í molum,“ sagði Vigdís.
„Halda mætti að borgin væri fyrst nú að komast út úr torfkofanum, með fullri virðingu fyrir torfkofum. Áætlað er að 10 milljarðar fari á næstu árum í stafræna umbreytingu. Hér er verið að veita 1,8 milljarði í nýtt síma- og samskiptakerfi, endurnýjun á netskápum og netskiptum, allsherjar innleiðingu á fjarfundarbúnaði, innleiðingu Microsoft Office 365, innleiðingu á kerfi til að halda utan um hugbúnaðarleyfi og búnað, hefja innleiðingu á alþjónustu á prentumhverfi, rafrænt fræðslukerfi, úthýsingu tölvuvélasala í gagnaver og öryggis- og aðgangskerfi í stjórnsýsluhús. Öll þessi mál eru trúnaðarmerkt. Hvað þolir ekki dagsljósið? Hvað er eiginlega í gangi hjá þessum meirihluta? Samstæðan skuldar hátt í 400 milljarða og er rekin á lánum,“ bókaði Vigdís.
